• November 19th, 2019
Login / Register

oshituthi oshi-29 shemanguluko pOlundjinda


Kefas Shipi Elago

OKATHITU KAMBANDA – Omasiku 21 gaMaalitsa 1990 oga li ga tyapulwa kehe mokakololo ke li moshitunda Namibia, sho Aanamibia ya li taya holola enyanyu lyawo sho oshilongo sha li sha zi muupika womutondi mbulu ngoka a li a kolonyeke Nambia evi lyookukulululwa uule womimvo odhindji.
Kakele kemanguluko oyendji wo oya li ya tyapula esiku ndika okuninga iituthihambelelo moka ya li ya pandula pamba sho a li a galula aakondjelimanguluko, aamati naakadhona mboka ya li ya kala muupongekwa ethimbo nuule.
Omatyapulo ngaka oga li haga ningwa konyala kehe momukunda, naoga li haga mwenyekwa niiyimbo yopashigwana naambyoka yopapolitika.
Konyala esiku lyomasiku 21 gaMaalitsa olya kala nokudhimbulukwa naanamukunda kehe oya kala nokutegelela esiku ndika nohamu, olundji oomeme oya li ya holoka pesiku ndika nomizalo dhopamithigululwakalo, nosho wo dhilwe ngaashi dhongundu tayi pangele nomalwaala gepandela lyopashigwana, oongundu dhomaudhano odha li dha longekidhwa nokwa li ha ku ningwa omatyapulodhimbulutho gamememe.
Ashike sho oomvula dha ende no kuhedha komeho, ondjele yokutyapula esiku lyemanguluko momikunda olye ende tali shongola, moka omikunda dhimwe dha ndopa nokuli okukaleka po nokuli etyapulo lyesiku ndika nomomikunda dhilwe ihali dhumwa mo we.
Omukunda Okathitu Kambanda moshitopolwa shaMusati, otushi oku gu kuthila ko embale oshoka ogwo gumwe gwomomikunda ndhoka dhi li dha kaleka po omuthigululwakalo gwokutyapula oshituthidhimbuluko shemanguluko ya li ye shi ningi okuza mo 1989 sho ya li yu uvu kutya epangelo ly South Africa nongundu yokakulumbwati SWAPO odha shayina okatokolitho kiigwanahangano 435, hoka ka li taka ti moNamibia ot mu ka ningwa omahogololo gaayehe ngoka taga ka kwatelwa komeho noku wilikwa kIigwanahangano.
Kundana okwa li a yi moonkundathana naMegameno Iilende komeho gwoshituthityapulo oshi-29 shemanguluko pOlundjinda moKathitu Kambanda.
“Moshitopolwa shika omwa li iita iilulu, nomahepeko omadhigu ngoka ga li ga ningilwa  aantu yetu mboka ya li taya lwitha uupika womutondimbulu, omapya oga li ga lyatwa po, omagumbo taga fikwa po, aantu oya li ya ningilwa omatilitho gi ili nogi ili, nombinzi oya li tayi kunguluka, onkene sho oomeme nootatekulu mboka oyendji ngashiingeyi ya kalala nale na yalwe oye li muukulupe oya li ya ningi omatyapulo ga kwata miiti sho yu uvu onkundana Namibia tali manguluka,” Megameno ta ti.
Okwa ti aakalimo yomoKathitu Kambanda nkene tuu ya tamekele nomatyapulo gemanguluko mo21 Maalitsa mo 1989 sigo onuumvo inaya pititha po nando esiku limwe, notaya tsikile moka nonuumvo etyapulo lyemanguluko olyi li komalwilo.
Kepulo kutya oye shi ende ngiini opo ya kale nokutyapula emanguluko iikando 28 ya landulathana Megameno okwa li a holola kutya okangundulongekidhi oka kala nokugwedha mo oohiinina momalongekidho naashika osha tsike onyika mokati kaanyasha mboka ya li ye ende nokukutha ko oshinakugwanithwa shokuunganeka esiku ndika komapepe gaakuluntu mboka ya li ye li tameke po.
“Emanguluko nonuumvo otatu li tyapula polundjinda nangaashi shi li omukalondjigilile otatu ka langeka okatana, opo tu ka nyanyukilwe pamwe noohailwa ooyakwetu, omupopi a simana gwesiku ota ka kala ngoloneya omukulu gwoshitopolwa shaMusati naangoka ngashiingeyi e li omukwatakanithi gwoSWAPO moshitopolwa shaMusati Sacky Kayone,” Megameno ta tsikile ko.
Onkene ota ndi hiya aantu ayehe opo ya holoke pOlundjinda momasiku 23 gaMaalitsa yo ya ka tyapule pamwe.
“Eteni uunona opo wu ye wu pewe mo mombago yemanguluko wo wu tseye onakuziwa yoshilongo shetu, ileni mwa hwama mombepo yemanguluko oongundu dhopamuthigululwakalo ileni tu tyapuleni pamwe ileni momizalo dheni,” Megameno ta holola.


Staff Reporter
2019-03-22 10:59:13 7 months ago

Be the first to post a comment...

You might also like...