• September 23rd, 2020
Login / Register

Osikola yopaungomba ya kwathele aanona ye na uulema



ONGWEDIVA - Osikola yopawungomba moshitopolwa shaShana tayi ithanwa Power to Power mOkandjengedi oya gandja omagano giikulya kosikola yaanona ye na uulema yedhina Dr Aupa Indongo Special Care Centre.

Omukuluntu gwosikola ndjoka Helmie Shaanika okwa ti oya gandja omakwatho ngoka nelalakano lyoku uvitha aanona ye na uulema ombili nohole oshowo oku ya ulikila kutya oye na oshilonga moshigwana, noshigwana oshi na nayo. “Aanona ye na uulema aantu ya fa aanona aakwawo, onkene oye na okukwathelwa ngaashi aanona aakwawo ye li koosikola dhilwe. Osha simana oku uvitha aanona mboka ohole ethimbo alihe opo ya mone kutya nayo oye na oshilonga noya simanekwa,” Shaanika ta ti ngaaka. Aanasikola okwa li ya kwathelwa niikulya ngaashi uuchepisa, oorosa, oosuka, omagadhi gokulya, uusila, omakoloni oshowo ikwathithi yilwe, ayihe kumwe oya pula ongushu yi vule N$ 10 000. Natalia Shikesho ngoka a longo oomvula heyali naanona ye na uulema okwa ti osha kala oshidhigu okukondolola aanona mboka oshoka ngele owe ya ganda uuna ya ninga epuko ohaya uvu nayi nohaya mono ya fa taya ningwa nayi. “Aanona ye na uulema ohaya pongola mbala, onkene osha pumbiwa ethimbo alihe ya kale taya silwa oshimpwiyu noku uvithwe ohole,” Shikesho ta ti ngaaka.

Shikesho okwa kumagidha kehe ngoka e na nenge ha zi nomunona e li monkalo yi li ngaaka, a kambadhale oku uvitha omunona ngoka ohole ethimbo alihe opo naye a mone kutya naye okwa simana noku na oshilonga uuna e li mokati kayakwawo. Natango okwa indile oshigwana shi tsikile okuyambidhidha naashoka shi na, tashi vulu okutula omitima dhaanona mboka pomahala a gandja oshiholelwa shiidhanitha. “Onda longa naanona ye na uulema oomvula odhindji ihe sigo onena inandi dhenga nando okanona kamwe uuna ka ninga epuko, oshoka ondi wete nda fa andi ka ningin ayi. Ashike ngele onda popi nayo, peha lyoku ya dhenga ihaya endulula omapuko ya ningile,” Shikesho a popi ngaaka. Ngoka e na ohokwe okugwedha po pwaashoka sha  gandjwa kaanona yosikola Aupa Indonga otaya ka pandula noonkondo , noya manguluka okutambula kehe shoka taya ka yambidhidhwa nasho.


Victoria Kaapanda
2020-07-15 09:12:05 2 months ago

Be the first to post a comment...