• November 13th, 2018
Login / Register

Oukadona poLuderitz Junior va pewa omakwafo



Lüderitz – Ovanafikola voukadona poLüderitz Junior Secondary School ovo ve li momhumbwe ova pewa omaano  eefewa dokulikosha, omaadi okuvava, oulikushifo komayoo nomiti dokomayoo,  okupitiula mehangano loPebble Foundation.  Omaano okwa yandjwa Etitano loshivike sha ya.

Omukalelipo wehangano loPebble Foundation Yvonne Fegueira moshipopiwa shaye pefimbo lokuyandja omaano aa okwa tumbula kutya omaano aa okwa dula okutopolelwa ovanafikola ovo ve li momhumbwe, omolwa eyambidido loshimaliwa osho sha yandjwa kehangano lokuyula eeshi loMarco Fishing olo la yandja oshimaliwa N$5000.

Fegueira okwa tumbula kutya ehangano loPebble ola unganeka opo omaano oludi eli a pewe ovanafikola ovo ve li momhumbwe, unene tuu eshi va yuka momakonaakono a xuuninwa, opo ve lihonge nelitulemo, vaha palamenwe komashongo ena sha noudjolowele.

Okwa tumbula kutya eli olo elalakano loPebble, kuha kale nande okanona kokakadona take liteeka kofikola noku efa po ofikola omolwa eemhumbwe odo tadi dulu okukandulwapo.
Pefimbo omaano taa yandjwa, okwa li yoo kwa longekidwa oipopiwa oyo tai tu omukumo ovanafikola opo ve litulemo mehongo.
Omunailonga mehangano lo Marco Fishing nokwa li nale omulongwa pofikola Lüderitz Junior Secondary School Rashadi Amunjera okwa twa ovalihongi omukumo, va tetekelife Kalunga mwaashishe tave shi longo. Va kale needjodi diwa odo tadi hange efindano, va longe noudiinini vaha ngwangwane ndele va ye komesho naasho tashi eta elunduluko liwa monghalamwenyo yomunhu.

Okwa tumbula kutya ehongo olo oshipatululo shokuhanga efindano, momaifano a yooloka. Amunjera okwa fiila ovanafikola eendjovo domOmayeletumbulo odo tadi ti, ‘Oundede otau ku twala moluhepo’ Ta ti okulonga noudiinini otaku ku ningi omuyamba momaifano a yooloka.

Omaano okwa tambulwa ko komukulunhufikola Bessly Makaula oshoyo komukulunhuwiliki wovanafikola vakwawo Hileni Haupindi.


Tuulikki Abraham
2018-11-09 10:15:11 4 days ago

Be the first to post a comment...

You might also like...