• March 23rd, 2019
Login / Register

Ovakondjelimanguluko vatano va tumbalekwa nokupewa omapapa koNAFAU



Lüderitz – Ovakondjelimanguluko ve li vatano ovo va talika ko va dana onghandangala mokuunganeka ovanailonga koshi yehangano lovanailonga Namibia Food and Allied Workers Union (NAFAU) okudja nghene ehangano lovanailonga la totwa modula 1986, ova tumbalekwa nokupewa omapa kominista yeeshi needjo domefuta Bernhard Esau. Omapapa okwa yandjwa pefimbo lepatululo pambelewa lombelewa yopashitoplolwa yaNAFAU moLüderitz mehuliloshivike la ya.

Ovo va pewa omapapa ovo omunamido di li 69  Carolina Nangula Wilem  odalele yaNyaanya moshitopolwa shaShikoto, nokwa kala omunailonga mehangano lokukwata eeshi ledina Angra Pequena oyo konima ya ka lukwa ofabrika Lalandii.  
Omunamido 63 Johan Hendricks odalele yomoKeetmanshoop moshitopolwa sha//Khara okwa li omunailonga moLalandii nokwa li hamushanga waNAFAU moshitayi shomoLüderitz pefimbo okudja ehangano lovanailonga NAFAU eshi la totwa, nokwa kala ha kalele po ovanailonga meenghundafana di na sha nomawedelo eendjabi dovanailonga.

  Omunamido 63 Josua Shipunda Kayambu odalele yaNembamba mOkalongo moshitopolwa shaMusati, omunamido 63 Maria Gotes Manuel odalele yomoLüderitz nomunamido 64 Tuulikeni Frieda Shikangala odalele yokOnengali moshitukulwa Ohangwena.

Aveshe ovo ova pewa omapapa nokutumbalekwa, omolwa oilonga yondjungu oyo va kala nokulonga pefimbo va li ovanailonga momahangano okukwata eeshi, nova kala nokuunganeka ovanailonga pakupula oufemba wovanailonga u fimanekwe.

Mokupewa omapapa, keshe umwe okwa ya keumbo nokapandi N$12 000 .00, oyo a yandjwa omaano eshi ehangano loNam-mic layandja N$2000.00 kukeshe umwe, nehangano lo NAFAU Investment Holding Company la yandja kukeshe umwe N$10 000.00.

Ovakondjelimanguluko ava ova li vaufanwa onhomenawina okudja keembinga neembinga oko va kala, shaashi aveshe ove li moshipundi shetulumuko, vamwe ova kala ngaa modoolopa yaLüderitz, ashike aveshe ava ova li va futilwa opo va ka nangale muimwe yomeehotela edi domoLüderiz, omo va nangalala omafiku e li avali, naashi va ya kepatululo pambelewa lombelewa yoNAFAU, ova penduka moProtea Hotel moLüderitz.

Oonakulwa vakulu ava mokukondjela oufemba wovanailonga ova pandula unene komapapa oo va pewa, nova kumhika ovanailonga ovo ve li oilyo yehangano loNAFAU, ovo va li va ongala momwaalu munene  va shikule eenghulundjila  noku ulikila yoo omapupi taa landula mokulandula ehangano olo tuu eli.

Efiku olo tuu olo lepatululo pambelewa lombelewa yopashitopolwa yoNAFAU , ombelewa yoNAFAU oya li yoo ya pewa omaano, ngaashi ehangano loWelwitchia Cleaning and Catering olo la yandja omaano oitaafula oilundi nokompiuta yokulongifwa mombelwa.  Omaano okudja koWelwitchia okwa yandjwa kuMartin Mbambo naBen Shimanya ve a yandja kuhanushangandjai wehangano loNAFAU Jacob Penda.

Ehangano loHangana Sea food ola yandja N$15 000 ,Halifax Fishing N$4000, nehangano loNovaNam ola udanekwa tali ka yambidida ombelewa yoNAFAU, eshi omunambelewa e lile po eedjo dopanhu moNovaNam Manu Namukomba a pula omuPresident woNAFAU Wilbert Karupu e va tumine omusholondodo waasho va pumbwa mombelewa ipe yoNAFAU moLüderitz.


Tuulikki Abraham
2018-11-16 10:59:46 4 months ago

Be the first to post a comment...