• August 6th, 2020
Login / Register

Oyendji otaya iyutha koompango okukeelela oCovid-19 monooli



Victoria Kaapanda

ONGWEDIVA -  Nonando omikweyo omileeleka komeho goositola dhiikulya monooli otadhi yemateke, aakwashigwana otaya ihumbata taya iyutha koompango dha tulwa po.
Kundana sho a li ta ningi omapekaapeko nkene aakwashigwana taya ihumbata sho ya thikama momikweyo, okwa mono kutya otaya ihumbata nawa yo oya ipitithila po ehala pokati kawo ngaashi naana kwa tiwa oositola nadhi ninge.
Maria Santa ngoka a kala momukweyo owili netata positola yiikulya OK Food mOngwediva, okwa ti oshihwepo okwiidhidhimika sigo to pewa ompito yokuya meni lyositola.
“Elandulathano oshinima oshiwanawa. Kashi na sho tashi kwatha, ngele gumwe ta nyenyeta kutya omukweyo ogu na aantu oyendji omanga tu shi shi kutya oshike sha etitha omikweyo omile. Shoka tatu kambadhala nasho okulwitha omukithi gwoCovid-19 kaagu ye komeho,” Santa osho a popi ngaaka.
Ta ti ngashiingeyi oshigwana oshi uvite ko kutya omukithi ngoka ogwa nika oshiponga, sho osho tagu kondjithwa kaagu taandele moshigwana, onkene kehe gumwe oku na oku iyutha koompango dha tulwa po.
Santa okwa li a kumagidha aakwashigwana ya tsikile okwiikoha koonyala oshowo okulandula oompango adhihe dha tulwa po okukeelela Covid-19.
Omupopiliko nomugandji gwomawuyelele gwopolisi moshitopolwa shaHangwena Abner Kaume Itumba okwa ti oyendji moshitopolwa shaHangwena otaya iyutha koompango.
“Uupyakadhi owu li ashike pwaamboka haya shingitha iikunwa yokoongoma, unene otombo, inaya hala nando oku shi hulitha po nonande oye na ontseyo ya gwana kutya oshike oongeshefa dha patwa,” Itumba ta popi ngaaka.
Ta ti mboka taya landitha otombo oya tembudhila nokuli oongoma dhawo momagumbo oshowo momapya pokati kiilya, nelalakano lyokuholeka oongoma dhawo opo kaaya kwatwe kopolisi.
Itumba okwa ti aanangeshefa yomalovu ngaashi oombiila, sigo onena otaya iyutha lela koompango nonando  ope na ngaa aashonashona taye dhi kondo.
“Elalakano lyetu kali shi lyokumanga po aakwashigwana, ihe olyokuya uvitha ko oshowo okuya kwathela okukeelela omukithi gwoCovid-19,” Itumba ta gwedha ko ngaaka nomuthindo.
 


Staff Reporter
2020-04-07 09:12:03 3 months ago

Be the first to post a comment...