ONGWENDIVA – Muongaongi wakopano ya PDM mwasikiliti sa Ohangwena, Hidipo Hamata, ukupile liluko la linzila ni misebezi kubona kuli mapampili akulonga batu afumanehe kabunolo. Naize mundendende wakufumana mapampili awo, upaleliswa babanca babana ni mapampili abukwaezi kuipumanela masheleñi. Kusabateñi kwa mapampili awo kutisa kuli bakwaezi babañwi basebeze basina mapampili abalumelela kulonga batu, ili taba yebatiseza kuli bakone kufumana likoto zebukiti. Mi hakuekezwa nilitifo zamafosisa afamukwakwa kubatiseza kuli bazwafe nikutuhela. 

“Hakuna mukwaezi wanaha Namibia yabata kuloba mulao, kono haiba mapampiili hayo, mi hafumanehi kabunolo mubeya batu mwalikayamana, ili taba yetiseza batu butata,” nekubulezi Hamata. Hamata nakupile liluko leli bona zalinzila ni liluko lelibona zasilelezo ni buiketo kufumana tatululo sakata, mi naize buñata bwa bakwaezi batuhelanga misebezi yabona mwasikiliti mokubonahala kuli kutokwa misebezi kupahami, bakeñisa kutokwa mapampili akulonga batu. Mwamukopano one ulukisizwe kiba Nabta mwa Ondangwa ñohola, bakwaezi balimotikala zalipisinisi nebakupile kupo yeswana kwa muuso.

 Neba bilaezi nibona kuli zeswanela kulatelelwa zakatalisa ili kalulo yetisa kuli bakale kulonga batu basina mapampili. Nebakupile hape katengo ka Nabta kuli kahanise taba yakukalimisa mañolo, kakuli babañwi baba kalimisa mañolo kakulifisa habayo nimwalipisinisi zalinzila. Neba bulezi hape kuli mapampili awo mane afumaneha ni kwabaituti babaitusisa ona kuli bafumane mali akusebelisa kwalikolo. Hamata naize mapampili hakafumaneha kabunolo akahulisa sifumu sanaha. Kanako yeswana naize kusabateñi kwamisebezi kukatisa sebeliso maswe yalino zekola ni bunjebwe.