• November 16th, 2019
Login / Register

Pokati koshilaleko nomukonda…Aakalimo yomomalukanda goombashu ya nyengwa ngele naya hogolole tuu



WINDHOEK- Aakalimo yamwe yomomalukanda goombashu goKilimanjaro noBabylon moshikandjohogololo shaTobias Hainyeko moshilandopangelo oya ulika omakemo gawo omolwa ompumbwe yomayakulo gamuni ngaashi olusheno, omeya nuuyogoki. Omolwa ongeyo yawo, aakalimo mbaka otaya ti kaye shi ngele otaya ka hogolola oongundu dhopolitika ndhoka tadhi ka kondjela iipundi momahogololo gOmutumba gwEgumbo Lyopashigwana, osho wo oohandimwe mboka taya ka kuthathana po momahogololo gopaupresidente muNovemba nuumvo.

Konyala oopelesenda 70 dhaakalimo 48 000 yomoTobias Hainyeko ohaya z i momalukanda goombashu. Sha hala okutya aakalimo oyendji ohaya zi moombashu na kaye na evi lyawo yene.
Moonkundathana noshifo oshimwayina naashika shoNew Era, aakalimo yamwe oyu uvite kutya aahogololwa yoongundu dhopolitika ohaye ya dhimbulukwa ashike uuna omahogololo ga thikana noku ya dhimbwa konima ya mona omawi okuza kaantu.

Omukokele gumwe gwoomvula 62 Ndapewa Shamwaha ngoka e li omukalimo gwomoBabylon kosindo yaVenduka okwa ti ke wete etompelo lyokuhogolola nuumvo. 

“Ohaya kala ashike taye tu ningile omauvaneko kutya otaye tu etele olusheno, omeya nuundjugo. Otwa kala tatu hogolola oomvula adhihe ndhoka ashike kape na elunduluko lyasha. Sho osho nee tatu ti otatu hogololele shike. Itatu kala ashike tatu hogolola aantu ashike kape na elunduluko lyasha moonkalamwenyo dhetu,” Shamwaha ta ti ngaaka. 

Aakalimo oya li wo ya ti aanapolitika oya kala oomvula adhihe ndhoka taya uvaneke kutya omilema momalukanda ngaashi Kilimanjaro, Babylon, Okahandja Park, Ongulumbashe, One Nation otaga ka kandulwa po. Aakallimo mbaka oye wete ya ekelwahi ngele otashi ya komayakulo golusheno. Aakalimo taya ti omayakulo inaga kala ge na okakombo noludhi.

Ngele tashi ya kuuyogoki otaya ngongota kutya kaye na uundjugo, taya gwedha ko kutya uundjugo waayehe mboka wa li wa tungwa oomvula dha piti itawu longo we. Onkene onkalo ya tya ngaaka anuwa ohayi ya thiminike ya ka ikwathele momilamba, moka mu na omayoka osho wo ookalyamupombo.
Omukiintu gulwe ishewe gwoomvula 55 Johanna Kambala, omukalimo gwomoKilimandjaro, ota ti kaye na uundjugo.

“Otwa kulupa ashike ohatu ki ikwathela komilamba. Otwa sholola okuhogolola. Otwa kala nokuhogolola tu mone elunduluko ashike onkalo oyi li ashike ngaashi ya kala. Otwa ekelwahi kepangelo,” ta ngongota ngaaka.

Omukalimo gumwe ishewe gwomolukanda lwaGoreangab Johannes Lazarus okwa ti ita hogolola oshoka epangelo kali na ko nasha naakwashigwana. Ta ti aanapolitika ohaya ningi omauvaneko yo taya kana po konima yomahiogololo.

“Epangelo olya tula aakwiita naapolisi momapandaanda mboka taye tu ningile omambandameko esiku kehe. Uuthemba wetu otwe wu kuthwa oshoka ihatu vulu okupula shi na sha nomaihumbato gawo. Epangelo lyopaife otali tu dhimbulukitha epangelo lyokatongotongo lyuukoloni  moka twa li tatu dhipagwa. Aapolisi mbaka naakwiita otaye tu dhimbulukitha iita, onkene kape na etompelo lyoku ka hogolola. Ngele owa adhika to landitha iinima yoye mepandaanda, oto yi kuthwa kopoisi,” ta nyenyeta ngaaka.
Omunamimvo 66 gwomoHakahana, Theresia Kauazunda okwa ti okwa ti ye ota ka hogolola oshoka ke na uupyakadhi nepangelo. Ta ti osha simana oku ka hogolola.

“Ngele ito hogolola nena ku na ewi. Tse onga aakulupe otwa kala momake omawananwa gepangelo. Ohatu mono oopenzela dhetu dho noondjo dhetu dhomeya ohadhi ekelwahi. Omolwashike tu na okukala inaatu hogolola tse tu na omawuwanawa agehe ngaka?” ta pula ngaaka.
 


Albertina Nakale
2019-10-23 07:52:29 23 days ago

Be the first to post a comment...

You might also like...