• September 22nd, 2020
Login / Register

Pomomatala nomapandaanda gaSwakopmund natango otaya pindike



SWAKOPMUND – Municipality gwaSwakopmund ota ka pitika aalandithi yomomapandaanda ya tsikile nokulanditha iilandithomwa yawo, ashike otashi ka ningwa kohi yoongamba dhuundjolowele dha yaga kegonga. Ndhika odha popiwa komukuluntu gwoshikondo shomayakulo guundjolowele Clive Lawrance.

Oondoolopa odhindji mwa kwatelwa Walvis Bay oshiwike sha zi ko odha li dha indike omalindithilo gomomatala nomahalandjandja onga onkambadhala yokukeelela omukithi nguka gwocoronavirus. Aantu yatatu okwa li kwa kolekwa ya kwatwa komukithi nguka moNamibia, shoka sha li sha eta opo oosikola dhi patwe osho wo okugongala komangungo ku indikwe palombwelo lyaPresidente Geingob.

Lawrance okwa li a lombwele oshikundaneki oshimwayina naashika shoNew Era opo ya vihe shoka ye na okuninga po, noya mono kutya oku indika iipindi otaku ka lyatela onkalo yaalandithi pevi noonkondo.
“Otwa tsu kumwe opo tu ethe aalandithi yetu ya shingithe monkalo yi li kohi yegameno enene. Otwa li wo twa gandja uuyelele kombinga yomukithi nguka notwe ya kwathela niikwa niipangitho yoku opaleka, “ ta fatulula ngaaka.

Lawrance ta ti kutya oye na aashingithi ye li konyala 200 mboka ya ishangitha no150 inaaya ishangitha mboka haya longele moSwakopmund. Ta ti aalandithi oye na uuyelele kombinga yocoronavirus noya landa  uuthewa wokuyoga iikaha yawo yene.

“Onkene okutetula onzo yawo oyo ayike yiiyemo osha li oshinima sha nika oshiponga. Ashike otatu kwashilipaleke aakalimo ayehe kutya otaya kala ya ligamena ko eho notaya ka kutha oonkatu dha pumbiwa uuna sha pumbiwa. Onkene ngashiingeyi otaya vulu okulanditha,” ta ti ngaaka.
Omukuluntuwiliki gwaMuni gwaSwakopmund, Archie Benjamin momushangwakundaneki kutya nayo oya ninga omatokolo kombinga yomangambeko ga tseyithwa kupresidente Geingob. “Onkatu otayi ka tala unene kutya uundjolowele negameno lyaaniilonga ayehe osho wo aakalimo yomondoolopa owa talika ko wa simana,” ta ti ngaaka.

Nonando ongawo aalandithi moWalvis Bay oyi iyadha muudhigu wu vule oonkondo dhawo konima sho kwa li kwa ningwa etokolo kutya inaya landitha manga. Muni gwaWalvis Bay okwa li a pata ehala lyomalandithilo lya tseyika nawa Ekutu Latika moKuisebmond, oongulumambo dhamuni, museums, omahala gokuvululukwa, omahala gokumbwinda osho wo omahala gokulandithila mondoolopa. 
Shika osha guma aakalimo oyendji mondoolopa, unene mboka haya hupu mokulanditha iikulya, iikulya yopamuthigululwakalo, osho wo wo iilandithomwa yilwe ya pumbiwa.

Aalandithi oyendji ohela oya li yu ulike omalimbililo gawo taya ti ngashiingeyi oye li monkalo ondhigu, unene tuu okufuta oorente dhawo nokugwanithila po oofamili dhawo iipumbiwa na kaye shi kutya engambeko ndika otali ka za po uunake.

Mayola gwondoolopa yaWalvis Bay Wilfried Immanuel kuyele okwa li a lombwele oshikundaneki shoNew Era kutya oye shi shi nawa kutya okulanditha momapandaanda oyo onzo yiiyemo yoofamili odhindji nokwa ti elelo otali tala kondungethaneko yomeendelelo omanga omahala taga kala ga pata.


Eveline de Klerk
2020-03-25 09:33:28 5 months ago

Be the first to post a comment...