• February 26th, 2020
Login / Register

Presidente Geingob momitumba dha yooloka moNew York



WINDHOEK- Omupresidente Hage Geingob osho a ka ulika ethano lyiilonga okukaleka po enawapalo lyonkalo yombepo mOmaandaha goshiwike shika, koshigongalele, shIigwana yaHangana moNew York.
Ndhika opdha popiwa komushangindjayi gwiikundaneki kegumbo lyepangelo omundohotola Alfred Hengari mOmaandaha ngoka a hokolola kutya ngashingeyi presidente ke mo moshilongo molwomitumbagongi ndhoka.

Geingob okwa tegelelwa nduno opo a ulike a tseyithe omutengenekwathaneko -malongekidho gwoovula ntano ngoka tagu ulike eshunitho pevi lyombepo tayi nyateke ewangandjo momumvo sho tagu ka kala 2030, omanga ta kutha ombinga momutumba gwIigwana yaHangana ngoka ngashiingeyi gu li kombinga yonkalo yelunduluko lyompembo newangandjo gwonuumvo.

Geingob okwa li u ulike nduno omutengwanekwathaneko ngoka  moshilandopangelo shoka moka nduno a thiki mo nale mEtitano opo a ende omutumba ngoka  gwedhina United Nation General Assembly (UNGA74) moka mu na ashike omitse dhiilongo mbyoka hayi gongala aluhe momitumba dhoka.

 Omutumba nguka ogwa tegelelwa okupatuluka pambelewa nena (Etiyali) kohi yotema: ‘okulongela kumwe pamuhanga nelalakano lyoku tidha po oluhepo oku eta po elongo lyongushu lya kwatela mo ehwepopaleko lyonkalo yombepo.’ 

Momutumba ngoka gwoUnited Nation General Assembly (UNGA74), Geingob woo naye okwa tegelelwa a kale a popya mo oshipopiwa she opo shi wape oku pulekenwa kaanambelewa aakuluntu muuyuni mboka oyendji ye li omitse dhiilongo.

MOmaandha Omuprima gwaNorway Erna Solberg, okwa hiya Geingob wo opo kale a hita oshigongi shoka tashi ka popya kombinga yuuwanawa tau zi moonzo dhomefuta, nelunduluko lyombepo.  

Hengari okwa hokolola kutya  Geingob ngoka  a kala omuhwahwameki omunene  moshikonga  shoAfrica  Renewable  Energy  Initiative  okwa kala e na oshiho opo mu kale mu na ehumo komeho lyi li nawa ngele tashi ya koshikumungu shoka sha zilila unene poshigongi shoka sha li koParis Accord momumvo 2015.

Amushanga gwiikundaneki okwa hokolola kutya Geingob okwa tegelewa wo a ka kale miigongi ya yoolokathana nomitse dhiilongo yilwe ngaashi Uhuru Kenyatta  presidente gwa Kenya, Tjijjani Muhammad-Bande omupresidente  gwomutumba gwopayuni ngoka opo a hogololwa , Hilda Heine omupresidente gwaMarshall Island, noshowo Narendra Modi ngoka e li omuprima gwaIndia, okutumbula mo ashike yamwe mboka taya ka ya moonkundathana naGeingob oshiwike shika omanga e li kondje yoshilongo.


Loide Jason
2019-09-24 08:04:08 5 months ago

Be the first to post a comment...

You might also like...