• June 25th, 2019
Login / Register

SABC ya tidha omuwiliki gwopolohalama molwa okavidio



Omuwiliki gwopolohalama yokoshitaasi shoradio yedhina Ligwalagwala okwa tidhwa miilonga sho anuwa a li a tula uuvidio komapandja gosocial media ta pula aalumentu ya kamatuluke okugandja oshimaliwa kaakulukadhi nokoohonda dhawo. Shika osha li she mu ponokelitha nomalaka kaapulakeni mboka ya ti ota yonagula aakiintu ya tameke okwiilanditha. OSABC oya li ya popi mEtiyali kutya Khaya Matchegue, ngoka a li ha wilike opolohalama yedhina Khibika natsi okontalaka ye oya hulithwa po.
Matchegue okwa li a tula uuvidio kosocial media mboka wa kwatelwa mostudio, moka a li a ti aalumentu naya pe oohonda naakulukadhi yawo iimaliwa. Mukamwe komuvidio oku limo ta ti” “Ngele omulumentu ite ku pe iimaliwa, nena oku na ngoka te yi pe.”
Omupopiliko gwoSABC Vuyo Mthembu okwa ti: “SABC otayi koleke kutya okontalaka yaMatchegue oya hulithwa po. Ashike itatu yi muule woshinima shika oshoka oshi li pokati koSAC naMatchegue.”
Ligwalagwala FM oya li ya pititha omushangwa  tagu ti: “Molwa oshinima shoka sha holoka po oshiwike sha piti, elelowiliki lyaLigwalagwala olya kutha etokolo lyi hulithe po okontalaka yaKhaya Matchegue mbala ngaashi tashi vulika.” Oshitasi tashi ti kutya etokolo olya li lyi ikwatelela kolopota yaMatchgue ndjoka a li a shanga nokwa itaala kutya oku na ondjo mokuteya oompango dhomokontalaka ye.
“Okwa itaala kutya omayihumbato ge oga vundakanitha edhina lyoshitaasi osho wo a topola aapulakeni pamukalo gwa tya ngaaka.
Ligwalagwala FM ina tseyitha natango ngoka ta ka pingena po Matchgue. Nonando uuvidio e u kutha ko koFacebook onkene natango u li tau tulwa ko kaantu yalwe mboka ya li ye wu pungula moongodhi dhawo.


Staff Reporter
2019-05-31 12:12:50 25 days ago

Be the first to post a comment...

You might also like...