• July 8th, 2020
Login / Register

Salute Boxing Academy ta lalakanene ompolo nuumvo



Maurice Kambukwe

WINDHOEK – Mwene gwoSalute Boxing Academy Kiriat Kamanya okwa ti kutya okalaba ye otayi lalakanene okusindana omapapa ogendji momumvo gwo2020. Ta popi noNew Era Sport omasiku ngaka, Kamanya okwa ti ke wete naanaa ya li ya longa ya tula ombunda moshihwa omumvo gwa yi, nonando ya li ya unganeke iinyangadhalwa ya yooloka ya dhenga mbanda. 

Kamanya ta ti wo otaya ka tala nokukonga omaudhano gopaigwana osho wo omaudhano ngoka taga ka pa Salute Boxing ontseyo ndjoka ya pumbiwa.

“Omvula ndjika otatu ka tala komapapa omanene osho wo omaudhano omanene gaabokisi yetu, shoka ndi wete tashi ka kwathela  aabokisi yetu ya mone ontseyo yo ya kale wo ya yalulwa. 

Ondi wete kutya omvula ya za ko otwa li tu na iinyangadhalwa oyindji twe yi unganeka ashike inatu adha omalakano getu, ashike ondi na etimaumbwile kutya nuumvo ayihe otayi ka kala kolutenda,” Kamanya ta ti ngaaka.

Ta gwedha ko wo kutya ota ka yambidhidha aabokisi ngaashi Nathaniel Kakololo a ka kondje muudhano uunene omvula ndjika.

“Otatu ka kongela omudhani gwetu ngoka ta endelele, Nathaniel Kakololo ngoka a kala nokusindana omaudhano ge oomvula ndhoka dha piti. Oye gumwe gwomaantu mboka ye na oshitalenti nonakuyiwa oye mu egulukila.”


Staff Reporter
2020-01-14 07:36:56 5 months ago

Be the first to post a comment...