• September 20th, 2020
Login / Register

Shangula a londodha aapopi yiipwalaga yoCovid-19



Minista yuuhaku nuundjolowele Kalumbi Shangula okwa hokolola kutya uuwi mboka tawu popi kutya Aambandja otaya ende moombululu okuya moshilongo, kau na uushili nowa nika uukwamuhoko.

Okwa ti kutya aaniwa uuwi mboka itawu popi nande oshili, nokwa indile Aanamibia ya ikaleke kokule nokuppopya iihakwakwa.
Shangula okwa popi ndhika koonkundathana dha nuninwa owina okupopya kombinga yoCovid-19 ongula yOmaandaha.
Okwa li woo a gandja uuyelele kutya ngashiingeyi, moshilongo omu na iipotha yoCovid-19 yi li 21 moka iheyali yi li mo natango tayi pangwa.
Iipotha mbyoka iipe ya lopotwa moshilongo ngashiingeyi ayihe oya za koshilongo shopuushiinda South Africa sho aantu mboka ya galukile moshilongo ya li ya kalekwa mookamba dhokwiikalela ya konaakonwa komasiku gahugunina.

Ngashiingeyi aakiintu yaali naalumentu yatatu oye li ya kondekwa mookamba dhokwiikalela sho ya li ya monika ombuto ndjoka.
Gumwe gwomaantu mboka shi ikololela kuShangula oku li omuhingi gwomaloli ngoka a li a kala mookamba dhokwiikalekelwa uule womasiku ge li 11.

“Konima yomasiku ngoka omulumentu ngoka gwoomvula 47 okwa li a tokola okwiiyaka mo mookamba ndhoka, ya iyaka mo nomuhingi omukwawo. Oya li ya yi omalukanda ngoka mondoolopa ya WalvisBay nangashiingeyi oya li ya mangwa po nokugalulilwa mookamba dhomoshipangelo shepangelo moka e li a ikalekelwa oshoka okwa monika ombuto,” osho sha hokololwa kuShangula ngaaka.
Ashike Shangula okwa li woo a kumagidha aakwashigwana mboka ye li mookamba ya iyuthe koompango nomalandulathano opo oshilongo shi lwithe ombuto ndjika ngaashi naanaa shi na okukala.

“Ngele aantu itaya iyutha koompango nomalandulathano nena owa tegelela ashike omukithi gu taandele ndele onkalo moshilongo tayi nayipala,” osho Shangula a ti ngaaka.

Pethimbo opo tuu mpoka Netumbo Nandi Ndaitwah okwa popi ta ti kutya sho oshikumungu shoCovid 19, iigwana yaAfrica oy ali ya kundathana nkene tayi gamene noshowo okukwathela oontauki mboka ya edhililwa muAfrica.
Okwa t omalandulathano ngoka ga tulwa po oongoka ngaashi oku longa oontauki oku tsikila nomailongo gawo momahala gawo koE-learning.
“Sho tatu popi ngiika kapu na nande okamba yoontauki ya lopota oshipotha shomukithi gwoCovid-19, na onkee otuna oku gamena oontauki,” osho Nandi-Ndaitwah a hokolola ngaaka.


Loide Jason
2020-05-26 09:13:00 3 months ago

Be the first to post a comment...