• February 26th, 2020
Login / Register

Shomumvogali osho ngaa shonuumvo … Oniipa Primary natango kayi na oongulu sho dha hanagulilwe po kombepo



OMUTHIYA -  Konyala aalongwa 300 poprimasikola yaNiipa otaya longelwa mootenda, oshoka osikola kayi na omatungo gokolela oku ya pitika ya longelwe mo. Shiika osha landula ombepo yoshikiungulu ndjoka ya li ya hanagulapo nokuyelula ko iipeleki komatungo posikola mpoka omvula ya zi ko muNovemba. 

“Oshidhigu noonkondo, osho omukuluntusikola Matias Mpinga a ti, sho a li a popi kombinga yomashongo ngoka ga taalela osikola ndjika yomuumbangalantu waNamibia. Okuza esiku lyoshikungulu shoka aanasikola oya ka shanga omakonaakono mootenda, ya li ye na einekelo kutya uupyakadhi mbuka otawu ka kandulwa po mbala sho oshikako shotango shonuumvo sha tameke. 

Ombepo ndjika oya li wo ya hanagula po uundjugo u li uhamano mboka wa li hawu longithwa kaanasikola mboka ya adha po1000; Mpinga ta nyenyeta kutya osikola oya taalela omashongo unene sho yi li  yaa na oongulu dhokulongela dha gwana nawa, moka omathimbo gontumba to adha ongulu yi na aanasikola 47, omwaalu ngoka gwa pitilila ngoka gwa uthwa kepangelo gwaanasikiola 35 momulongi gumwe. 

Sho omutoolinkundana nguka a li a talele po osikola ndjika oshiwike sha za ko, okwa li a adha aalongwa yamwe taya longelwa kohi yomiti omanga yalwe ya adhika taya kombo opo pu tulwe ootenda. Shika eshongo enene, ndyoka tali eta iizemo ya nkundipala, omumvo gwa za ko aanambelewa oya li ya talele po osikola ndjika nokwa li kwa tokolwa kutya otapu ka tungwa oongulu dha gwedhwa po.

Aaanona mboka ya gumwa koshinima shika oomboka ye li mondondo 4-6. “Oongulu odhi na aalongwa ya pitilila noonkondo, omanga yamwe taya longelwa mootenda. Omukuluntusikola ta ti ngaaka. Otwa li tu na etimaumbwile kutya ayihe otayi ka kala pomahala sho osikola ya tameke, ashike ngashiingeyi otwa tula omitse kepepe oshoka inapu longwa nando osho sha.” Mpinga ta popi wo kombinga yuundjugo wosikola wu li monkalo ombwiinayi, ta ti otawu vulu oku eta omikithi dha yooloka oshoka omwaalu gwaanasikola ogwa ya pombanda noonkondo.

Ta ti nonando oongulu dha udha nale, aakuluntu onkene tuu taya mbomboloka oku eta aanona yawo ya hite posikolka mpoka. Ngashiingeyi osikola oyi na aalongwa ya adha 100 ya tegelela okutaambelwa mo. Mpinga ta ti: “Kehe omumvo omwaalu gwaalongwa otagu yi pombanda nosikola itayi vulu we oku ya humbata. Otatu ya taamba ashike oshoka itatu vulu okutinda aalongwa.O shitopolwa shoka oshi na oosikola odhindji dhopaumwene, onkene osha simana kaavali mboka itaaya vulu okufuta oosikola ndhoka ya ete uunona wawo mpaka. Oonkambadhala okumona okomenda komukuluntu gwelongo Aletta Eises odha hulile muunyengwi.


Obrien Simasiku
2020-01-20 08:42:44 1 months ago

Be the first to post a comment...