• October 16th, 2019
Login / Register

Swapo a patulula omaxwaxwameko omahoololo omo2019


ONGWEDIVA – Omupresidente wongudu ta i pangele Hage Geingob okwa patulula pambelewa omaxwaxwameko ongudu yoSwapo oku lalakanena omahoololo opashiwana oo taa ka kala ko muNovemba 2019.

Oshiwana shili momangungo, hano ovanhu ve li omayovi, ova waimina Geingob koshiindingili osho sha li mehalandjadja omo ha mu kala oshivilo shokomudo shOlufuko KOutapi.
Eshi a papofa oshiwana, Geingob okwa ti ongudu yoSwapo oye shi pondola oku kala ta i lele oshilongo omolwa omadilaadilo mawa, oo haa papalekwa efimbo nefimbo. 

Geingo ta ti Swapo okwa dja nale, a dja kefimbo lekondjelomanguluko opo a li ta lelwa komukokoli Presidente   Sam Nujoma, te ya ponghatu yombili nengungumano mewiliko lomupreidente mukulu Hifikepunye Pohamba. Na Geingob paife okwe li neekelelwa a kaleke po etwikilo neyokomesho mongudu.  
Ta ti oku tala oko kwa diwa, osha yela kutya ongudu yoSwapo natango ota i ulike kutya oyo ashike ongudu yopapolitika moshilongo oyo tai dulu oku twala oshilongo ponghatu opo oshiwana sha hala.  

Sho osho nee ongudu ya patulula omanifesto, ile omushangwa womalalakano nomaudaneko ayo, oku ya pomahoololo momwedi tau ya.  “Omushangwa wetu oo etwokumwe udafano olo hatu ningi noshiwana shaNamibia. Ota u popi eemhangela detu, omalalakano etu, nomadilaadilo etu ngene tu na oku xumifa oshilongo komesho –konakuiwa ya kola i na omauwa mahapu, Geingob ta ti.

Imwe yomwaayo ya udanekwa momanifesto oSwapo oya kwatela mo okutala tete eengeshefa da Namibia ngee ta ku yandjwa eetendela depangelo, oku lwifa onghalo yoku dengela odi peisho, oku hapupaleka omuvalu wovakainhu, ovanyasha novanhu ve na omaulema melelo nomoku nonga omatokolo nosho yo okueta po eemhito delongo nomadeulo kovakwashiwana. 

Eshi osho oshiongalele shotete shopapolitika tashi ningwa kongudu yoSwapo oku taalela omahoololo opashiwana.

Ovanamibia okwa teelelwa va ye keenhele doku hoololela va ka hoolole omupresidete wavo nosho yo ongudu yopapolitika yoku lela oshilongo. Ongudu yoSwapo oya ulia Geingob oye a kale omuulikwa hoololwa wayo momahoololo omo. 
 


Staff Reporter
2019-10-07 07:50:36 8 days ago

Be the first to post a comment...