• October 16th, 2019
Login / Register

Ta longo olusheno nomhepo yoyeekelwashi yokoundjuwo 


Lasarus Hakwaake

EENHANA –Omunyasha umwe Omunamibia ota longo oshiwana nghene tashi dulu oku mona ouwa okupitila mekeelelo lelunduluko longhalo yomhepo olo la eta elikwatopomutima mounyuni aushe.

Ester Magano Hango omunambelewa wovanyasha moikwamudingonokolongo mouministeli womaudano ovanyasha noikwashiwana moshitukulwa Ohangwena, ota ulike nghee ovanyasha tava dulu okuya moshipala elunduko longhalo yomhepo oshoyo nomikalo diwa dokukaleka po omudingonoko pakulongifulula oyeekelwashi opo ku etwe po eenghono dolusheno okupitila momhepo yomeenyata. 

Hango, oo oye umwe womovanyasha ava tava longo nondjungu moku ulikila oshiwana kutya otashi dulu okulongifa omudingonoko moku li monene sha shomondjato, okwa ti ope na omhito ya mbwalangadja okulonga olusheno, po okudja monyata yokokandjuwo ile moikulya ei ya ola. 

Okwa ti nonande onghalo youxupilo ya nyaya komunhu moshilongo nena ye oku na omukumo kutya momudingonoko omu na natango eemhito odo ovanyasha tava dulu okulongifa opo va ete po eemhito doilonga noku limonena oshimaliwa osho tashi nawapeke eliko loshilongo.

Ester edi okwe di popya konima eshi a dja komauliko oipindi ovanangeshefa vashona a ningilwa koSwakopmund nokwa li a futilwa kehangano lopashiwana lovanyasha. 

Oshinima eshi okwe shi ninga nale omalolelo konima eshi kwa li a ninga oshoongalele shotete kombinga yomudingonoko novakainhu ovanyasha kombinga yeemhito odo tadi monika mounamapya oshoyo momudingonoko kuyele odula ei. Okwa ti, “ope na eemhito dihapu odo ovanyasha tava dulu okuninga noku li etela po oilonga ponhele yokutala kuholomende e va pe oilonga, oshiwa uhangwe wa tameka ye holomende ta yambidida.

Ester okwa yambukile koshitopolwa Oshana moshikandjohoololo Okatyali, oko a tameka okakunino kovakwashiwana manga ashike a li omulihongi wounamapapya koshiputudilo Shoudindoli oshoyo Ounongononi shaNamibia. Ester okwa kala ta longo novanyasha okudja moitukulwa ihapu yoshitukulwa shina sha nomudingonoko okudja modula 2009 osho she mu pa ounongo uhapu noku mu pa omhito opo a mone oilonga onga omulongi  wovanyasha shi na sha nomudingonoko kendiki lovanyasha kEenhana momudo 2013 fiyo opaife. Okwa ti nonande Omudingonoko hao naana oshimhungu osho kwa li a hala a kale a pyokoka musho okwa ka longela kumwe nomahangano omudingonoko ngaashi Ehangano laNamibia li na sha nelongo lomudingonoko (Namibia Environmental Education Network – NEEN), Oshikefa shaNamibia Shelongo lOmudingonoko Mombuwa (Namibia Desert Environment Education Trust – NADEET), nongundu yEtale laCuvelai-Etosha lomidingonoko (Cuvelai-Etosha Basin Environmental Working Group – CEB-EWG) oshoyo omalelo oitukulwa needoolopa. Mopaife ngaha oshikunino eshi a tamekele manga e li kofikola koshitukulwa shavo kOkatyali osha ninga oproyeka ya kula yoshiwana nosha yandja eemhito kovanyasha. Okwa kumaida ovanyasha va longife eemhito odo di li mounamapya oshoyo momudingonoko opo ve limonene oyuuyemo, okwa ti yee okwa manguluka okuyambidida ovanyasha ava ve liunganeka nawa nova loloka okukala omutumba vehe na eshi tava longo. 


Staff Reporter
2019-10-03 07:57:24 12 days ago

Be the first to post a comment...