• November 19th, 2019
Login / Register

Tava pula oifuta i li pauyuuki opo va dule okufiya po edu lavo



ONGWEDIVA – Ofamili imwe koAmarika oyi udite tai lyatelwa pedu eshi tai pulwa i fiye po edu lavo i yapukile onhele yomaudano. Amarika omukunda u li moshikandjohoololwa shaTamanzi moshitukulwa shaMusati. Ofamili ei otai ti kai li omhinge nexumokomesho moshitukulwa, ashike oya hala ashike okufutwa pauyuuki kepangelo.

“Ohandi yukifwa komufitu. Olyelye ta ka kwafela nge ndi kokole onhele oyo? Ihandi longo onghee kandi na oimaliwa yokufuta omunhu a kwafele nge mokukokola onhele oyo,” Joshua Uusiku ta ti ngaho.
Ofamili ei oya kala ponhele apa oule weedula 18 da dja ko, ngaashi naanaa kwa li ve i pewa kelelo lopamufyuululwakalo lopefimbo opo. 

Uusiku ta ti eshi a nangala onhele ei mo2001, kapwa li sha ponhele opo nokwa li e yi kokola osheshi oya li ya fita neenghono, ashike vati paife ota lombwelwa kutya onhele oyo tuu oyo oya li ya pewa ofikola nale. Ta ti okwa lombwelwa kutya neudo oyo odula yaxuunina okulonga epya laye, ashike oku na eikwatopomutima kutya omukulukadi waye nuunona omuwoi ote ke va palula ngeipi.

Nonande pwa ningwa eenghendabala donhumba a shaine omikanda odo tadi ti okwa itavela okutembuka po ponhele opo, Uusiku okwa ti okwa dika eenyala medu ta ti oku na oumbada kutya omikanda edi otadi ka longifwa a nuwe po. Ota ti ina mona nande omunambelewa nande oumwe a dja kOuministeli wOmadu nokwa li ashike a lombwelwa kelelo lopamufyuululwakalo a fiye po onhele yae pehe na ofuto yasha.

Ope na ouyelele kutya omilandu dokufuta ovakwashiwana ngaashi sha yufwa oda pumbwa okulandulwa pehe na okatongo kutya ove li peenhele dilipipo moshilongo. Mwene womukunda ina dula okukwatafwana nae a tye ko sha koshikumungu eshi.

Omupedukulunhuwiliki mOuministeli Wedu moshitukulwa shaMusati Rose-Marry Kashululu okwa ti oshiningwanima eshi ine shi uda nokwa pula ava va kumwa koshinima eshi va kwatafane nouministeli.
 


Nuusita Ashipala
2019-10-24 07:57:10 26 days ago

Be the first to post a comment...

You might also like...