• September 26th, 2020
Login / Register

Taya hupu shokadhila moshilandopangelo



Ofamili tayi mono iihuna molukanda lumwe lwoombashu moshilandopangelo, otayi hupu nuudhigu. Ofamili ndjika ohayi hupu ashike mekwato lyooN$250 lyepangelo noya ikolelela maashiinda osho wo mAasamalia aanamutimahenda. 
“Otu na ashike oohi mbali dhokulya nena,” osho omunamimvo 35 Saima Shivandu, yina yaanona yatatu ngoka ha zi kolukanda lwoombashu kuunyege woshilandopangelo a li a lombwele omutoolinkundana nguka. Nonando e li monkalo ndjika yoluhepo lwamemememe, Shivandu iha mono ekwatho nomayakulo taga zi koprograma yokutopola iikulya yoFoodd Bank. Ta ti wo iikulya yoCovid-19 nayo ohe yi uvu ashike ngokatana komiilya.

Shivandu ta ti onkalamwenyo oya li ya dhigupala unene sho kuume ke kopaihole a li a yi koRundu konima sho a tameke oku ehama, na ka li we ta vulu okutsikila niilonga. Konima yoomwedhi omugoyi lwaampoka, egumbo lye olya li lya hulithwa po okupewa iikulya okuza koFood Bank, oshoka kuume ke kopaihole oye a li a shangithwa – na sho kee po, itaya vulu oku ishangitha we.
“Iiyemo yegumbo lyetu oombyoka ashike hayi pewa okamwanamati kandje koomvula 14 yoku ikwathela okuza kepangelo, oshimaliwa shika N$250.00,” ta hokolola ngaaka. Sho ye ke na iiyemo kuye mwene, Shivandu naanona ye yaali oya tala ashike mAasamalia aanamutimahenda, aashiinda, osho wo mofamili omalupita.

“Ohandi mono uusila wepungu okuza mpaka, omboloto mpeyaka, nomalupita osuuka noohi dhomondooha,” ta ti ngaaka. 
Shivandu ta ti okukala ashike wa tala momagano to ga pewa kashi na olule, nokwa hala okutameka okasitola okashona pegumbo opo a ikwathele nofamili ye. Sho kee na iiyemo, Shivandu okwa kala wo itaa vulu okushuna kegumbo nenge kukuume ke kopaihole. 
Kamwe komaanona ye oke li kuyina konooli, omanga ye ha zi nokamonamati, hoka ke li mondondo onti-7 osho wo okanona ke koomvula ndatu hoka ihaaka yi kosikola oshoka kape na oshimaliwa shokufuta oshikunino.

“Onkelo yandje nayo oyi na ashike epando limwe lyoongaku lya tuuka; okamati oka li ka pewa oongaku dha kulupa kookuume ke. Omuzalo gwe gwosikola, ngoka a li a pewa, ihamu gu gwana nawa oshoka ogwa hula, ashike onda pandula sho oongaku dhe dhi li hwepo notadhi vulu okuzalwa. Onda hala a ilonge, pamwe ote ya a kwathele ndje. Oha ilongo nawa kosikola noha kwathele miilonga yomegumbo. Oha ka talela wo aashiinda omeya na ngele a futwa, oha landa omuhoka,” yina ta gwedha ko ngaaka. 

Iilikolomwa yawo yomegumbo mbyoka ya li ye na ngaashi esiga lyokohaasa, osho wo omakumbatha, oya li ya yakwa po.
“Onda li handi landitha iikulya momapandaanda, ashike kehe ethimbo tandi galukile kegumbo, ohandi adha mwa iteyelwa,” Shivandu ta ti, ta ti shika oshe mu shololitha.

Ngaashi naanaa aakiintu oyendji yomomudhingoloko ngoka, mboka taya kambadhala okupalutha oofamili dhawo, Shivandu oha toola uundooha moshilando noku ke wu landitha. Ashike kuye, shika oshidhigu kashona oshoka okwa li a dhomoka okugulu sho a li a kwiinina onkelo ye. Shivandu oha kambadhala okutoola uundoosha wu udha ooshako ndatu ndhoka hadhi mu pe ashike ooN$75.
Ta popi  nomeho ga kengela omahodhi, okwa li a lombwele oshikundaneki oshimwayina naashika shoNew Era nkene epando lye limwe ndyoka olyo alike e na lyi na oombululu kohi. Ta ti onkalo ye oye mu undula a kale ta nu iikolitha sha pitilila. 

“Ngashiingeyi onkalo ndjika otayi thiminike ndje ndi kale handi nu; oishidhigu okukala ndi li momaipulo gandje, nonda hala okusholola,” osho a hokolola ngaaka, ye ta tala momunkulo molwohoni nuuwehame tawu monika okupitila momeho ge.
Shivandu ta fala omadhilaadhilo konakuziwa, ta dhimbulukwa sho ya li ihaaya nana nuudhigu sho kuume ke kopaihole a li ha vulu okuyambidhidha. Kuume ke okwa li ha longo mokasino moWindhoek.

“Okwa li he tu lombwele tu kuthe okakalata ke tu ye tu ka lande iipumbiwa; katwa li hatu hupu nuudhigu ngangeyika,” ta dhimbulukwa onkalo ye yonale ngaaka.
Kansela gwoshikandjohololo shaMoses //Garoeb Martin David okwa ti ope na iinima yontumba ngiika tayi vulu okukuthitha mo Shivandu moprograma yoFood Bank. Okwa li a gandja omathaneko ge kutya Shivandu na kwatathane naye opo ombelewa ye yi mu kwathele a ishangithe moprograma yoludhi nganduka monahiya. Ta pula wo a ithane omuleli gwomomudhingoloko gwawo e mu kwathele mongashiingeyi.


Emmency Nuukala
2020-09-16 12:14:24 10 days ago

Be the first to post a comment...

You might also like...