• May 26th, 2020
Login / Register

Taya longelwa kohi yomiti…ompumbwe yaalongi posikola tayi shongolitha elongo



KANDUME – Aalongwa yondondo 10 no-11 poKandume Combined School otaya longelwa kohi yomiti konima sho oongulu dhiipeleki dha li dha hanagulwa po kombepo iiwike ya pita. Aalongwa oye li wo mompumbwe yaalongi miilongwa ngaashi yokulonga niimaliwa osho wo Oshiingilisa okuza nkene osikola ya tamekele. Uudhigu  mbuka owa etwa sho omusindalandu gwelongo gwa lunduluka, noposikola mpoka opwa gwedha ondondo 11.

Omwaalu gwaanasikola nago wo ogwa ya pombanda, shi ikolelela komapopyo gaalongi. Oshiwike shika aalongwa oya li  ya monika taya longelwa momizile dhomiti posheelo shosikola omanga yamwe ya li taya longwelwa momiti ndhoka dha gama kokapale komaudhano.

Omulongikuluntu Bonifatius Iyambo okwa ti osikola oyi li metifa lyokutunga oongulu niipeleki taya kwathelwa kaakwashigwana, opo ya vule okulonga oongundu ndatu dhondondo onti-10 osho wo ongundu yimwe yondondo 11.

Iyambo ta ti shika oshikando shotango osikola yi iyadha muudhigu wa tya ngeyi, nokwa li a pandula aavali sho ya itsike omutenge mokutunga po oongulu dhokulongelwa pamukalo gokwiiyamba. Ashike okwa ti okwa ikwata ngele uunona otawu ke shi enditha tuu nawa, unene tuu mboka ye li mondondo 11 mboka ya hala okuya kiiputudhilo yopombanda.

“Aalongwa mbaka oya palutha ootundi odhindji, oshoka otu uka nale metata lyoshikako shotango ndele sigo oompaka kaye na aalongi. Iilongwa yimwe inayi longwa sigo oompaka,” ta popi ngaaka nolukeno.
Shi ikwatelela kuIyambo, oshikondo shelongo moshitopolwa osha li ashike sha tseyitha oompito dhiilonga mbali, omanga osikola ya pumbwa aalongi yatano.

“Otu na ompumbwe natango, kape na ekwatho lela okulundulula onkalo ndjika,” ta gwedha ko ta ti ngaaka.
Osikola oyi na wo ompumbwe yiipundi okuza omvula ya za ko, onkalo ndjoka ya thiminike aalongwa ya ete iipundi yawo yene kootundi.

“Otwa kambadhala okukonga omakwatho ashike sigo oompaka kape na sha nando. Osikola kayi na wo ongulu yuungomba naashika otashi gumu aalongwa mboka ye na iilongwa yuunongononi. “Mekwathelo lyoshigwana otwa ipyakidhila nokutunga ongulumambo,” osho omukuluntusikola gwopakathimbo Jason Nyambali a ti ngaaka.
– osimasiku@nepc.com.na


Obrien Simasiku
2020-02-13 09:09:08 3 months ago

Be the first to post a comment...

You might also like...