• December 11th, 2019
Login / Register

Uuleli nawu pewe mboka taye wu vulu-Itula


Victoria Kaapanda

OSHAKATI – Okandidate ya ithikamena momahogololo twa taalela Panduleni Itula okwa li ti Presidente Hage Geingob na thige po oshipundi shuuPresidente, nokabinete ye ayihe. Ta ti kape na oshilongo tashi lelwa kaantu yaa na elandulathano.

Itula ndhoka okwe dhipopi mOsoondaha ya za ko molukanda Okandjengedi mOshakati, sho a li a ningi oshigongi shoka sha li sha gongele ehwata lyaanyasha mOshitpolwa shaShana.

Oshigongi shoka osha li sha ningwa okuhwahwameka nokukumagidha  aakwashigwana ye mu hogolole opo a sindane ehala lyuupresidente mEtitatu lyomasiku 27 Novemba moka tamu kaningwa omahololo.
“Kashi li mondjila okulongitha uushina okuhogolola, ngaashi nda kala tandi shi lwitha mohofa. Otashi kala sha wapala ngele twa longitha oombapila atuhe, opo tu mone izemo yi li mondjila noya yela nawa,” Itula ta ti ngaaka.

Okwa li a lombwele aakwashigwana ta ti mepangelo lye kape na omuntu ta kala kee na ehala lyokuza lye mwene, aanyasha otaya ka pewa iilonga, oopenzela dhaakulupe otadhi ka gwedhelwa nakehe egumbo otali ka kala lyi na okandjugo.

Itula okwa ti ngele a pewa oonkondo dhokulela oshilongo shika ote shi kutha muupika moka  shi li ngashiingeyi e te shi tula melandulathano onkene aakwashigwana naya hogolole mondjila.
Okwa gwedha po ta ti ngele oya tsikile okuhogolola omupresidente ngoka e li koshipundi oya tegelela oshilongo shaNamibia shi landithwe po.

“Ethimbo lyokuthikama nokuninga omalunduluko opaife, otwaloloka, oshigwana oshaloloka. Iipangelo kayi na omiti, aakwashigwana oya tindilwa omahala, shoka kasha li mondjila,” Itula ta popi ngaaka.
Itula okwa ti ngele a pewa oonkondo dhokulela oshilongo shika kape na nando omuNamibia ta ka mona iihuna oku na okulela nohole yomuNamibia  kehe. 

Okwa ti ke na esiku ta ka thiga po egumbo lye ndyoka lyi li moKatutura a ka ze komagumbo gepangelo kondoolopa.

Okandidate yi ithikamenapo Itula okwa ti aagundjuka otaya ka kutha po oopelesenda 40 dhokabinete ye. Itula ta ti oopoosa dha simana mokuninga omatokolo mepangelo odhi na okukala dhi na oopelesenda 40 dhaagundjuka. Ta ti aagundjuka oyo oyendji moshigwana noye na oonkondo dhokukala oyo taya pangele ngele tashi ya kokuhumitha komeho eliko. Ta ti oshitopolwa shika osho unene sha dhengwa ngele tashi ya kokwaa na iilonga.

“Shika osha etwa sho pwaa na omukalo gu ukilila okukandula po oshinima shika. Uupyakadhi uunene owo mbuka kutya mboka taya ti oye na onkwa naagundjuka kaye shi shoka sha halika kaanyanyamagulu. Kape na nando omuntu gumwe ngoka e li mopolitika paife a pule kutya aagundjuka oya hala shike, nenge kutya oya hala iinima yi longwe pamukalo guni nuunake ya hala sha longwa,” Itula ta popi ngaaka
Itula ta popi wo kutya ota kala ashike e na oominista 12 ihe itamu kala aapeviminista. Ta ti yane nenge ye vule po oye na okukala aagundjuka, mwa kwatelwa omuprima ngoka ta kwatakanitha iilonga yooministeli adhihe. Ta ti aaniilonga ayihe otayi ka kala niilonga sigo oompoka epangelo lya mana okuninga omalunduluko.

Itula ta ti okwa hala okukapititha oprograma yokutunga omagumbo opo aakwashigwana ya kale ya gamenwa. Ta ti ope na omahala ngoka taya ka pa mboka yaa na omagumbo. 
 


Staff Reporter
2019-11-26 08:49:35 15 days ago

Be the first to post a comment...