Katima Mulilo-Varandesi mononzira modoropa zaKatima Mulilo kapi vana yihafere eyi ndango zodoropa zina kuvasilika kurandesa mononzira domodoropa zina omu vana vasilike wondango zegendeso doropa ozo, eyi awo kuna kuyimona asi kapi yina wapa kuna kuvatekura momudona.
Ndango zodoropa kazikadingwlire oku ava randesere owo wokurandesa mositarata moutatu wapiti, omu kavakafatwilire nawa nawa asi ngapi omu guna kara mukaro. Nye owo wokurandesa mononzira, hawe awo kapi kayivahafesere ekaropo lyondango pevango lina.
Vanagesefa gona ava kavatulire nye ehandu lyawo nalinye kovakansela, kavatente asi awo kuna hara kututwara kevango limwe lyopeke nye evango lina kapi tokagwana varandi ndi ogwane yiwizamo morwa kwakara ure novarandi vetu, evango lina kara asi kapi ngavalihafera nampili nakauke.
‘’ Ngapi nye omu ngatuvhura kuparuka kumwe novena vetu ava vana kara asi tavazi nye ngesi kosure kwahana nondja, morwa ose ngesi tuna zumbanesa varandi vetu, sinzi sovantu vana wiza apa ngesi tavaranda kovanekoro lyawo.
Ose ngesi kwato eyi natupitura kembo kongurova, morwa muteku nye gwangesi,’’ yimo ana kuhuyunga ngoso gumwe arandesa mositarata ogu ana pilire kuhara kugava edina lyendi. Wondango zodoropa zaKatima Mulilo, kavatanterere varandesi ava asi awo navavapa evango nalyo peke, varandesa eyi vana hara kurandesa positanda ntani mavango nye aga navavapako gamwe.
‘’Morwa kuna hara nye kuvapopera, komahudi gomonzira gana kuvhuka, ntani kwato yikasayise, makura ose kapi tuna kara negano limwe nye ntudi kutura veta mosirugana yipo zirugane.
Nkenye gumwe kuna kurandesa tupu mositarata moomu ana hara morwa kwato ekeverero nkenye,yimo ana kuhuyunga munasipundi gegendeso doropa zina John Ntemwa.
Gumwe gondango gendeso doropa, Watson Kalaluka katanterere varandesi mositarata asi kuna kuzuvha udigu weni ano ndango kuna kuyimona asi vahepa kurugana unene vatulisepo yihepwa nayinye eyi yina pili ngesi.
‘’ Ose nayina kumwe none tuna kara, morwa nose kuna kuzuvha udigu weni, nye morwa veta noukanguki weni kurandesa mositarata kapi nayikatwikira yimo ana kutanta Kalaluka.
Gumwe govarandesi Mercy Maswabi, katente asi age kuna kuyizuvha eyi vana kutanta vanaPolitika, nye kapi ana kuyitambura kweyi vana kuhuyunga morwa ngorooro ngoso ava huyunga.
“Ame kapi nina randesa Yuma kutunda ngurangura dogoro ngesi, makura yina kutanta asi nayina kapi nanisimba nondja dokukalya murarero.
Yinke nye eyi nani kapa vanavange ngurova mwanayina? Vana vange nayina tavakarara nonzara. Ose kuna kututantera asi tavatutwara kositanda nye ose tuvanzi unene.
Ame nare naturamo ehundiro lyokugwana evango positanda nye elimbururo nagwana asi kwato mavango, morwa elimbururo nye olyo ame yiyo nye natameka kurandesa mositarata,’’ yimo ana kutanta Maswabi.
Varandesi ava simpe kavasivanene asi kapi vana vapeko siruwo valiwapayikire ediruko eli.
‘’Ose kavatutanterere tupu moutano sivike sina puko, asi twahepa kurongera momandaha tatutundupo pevango eli,’’ yimo ana kutanta gumwe govarandesi ogu yina gumu momunene. Vamwe vetu ose kwalironga, kwagwana no Diploma ntani noDegree nye kapi tuna kugwana yirugana nampili nakauke. Kupi nanigwana N$50 000 nifute muntu apenge yirugana? Yimo ana kupura ngoso gumwe nage arandesa mositarata.
Nanvula Lilungwe katente asi; ‘’Awo kuna kutjinda nkenye gumwe ana kurandesa mositarata, rambangako vaZimbabwe novaZambia. Nye ose kapi tuna kara noudigu novaZimbabwe, morwa awo kapi avarandesa eyi aturandesa ose.
Udigu wetu vaZambia, morwa awo nawo kurandesa yeyi tuna kuranmdesa ose. Mosiruwo nye sooso, gumwe gadivikwa arandesa mositarata, Judith Limbo, (48) ogu gakere asi kwamupulisilire arandesa pevero lyositora simwe, kaligende ano apa nye kavamutwere kosipangero sepangero saKatima Mulilo age yipo kakadogorokere momanda konyima tupu kutunda monomutangu kumwe novaporosi womomukunda.
Mokukwama muhuyungilipo vaporosi womomukunda horowere gwina, Kisco Sitali, katente asi eretesopo nomfa simpe kapi vana ligwana, morwa awo simpe kuna kundindira apa navamana kukona kona.
Ano yitundwamo yina kara asi kapi yina ziremo kuna kumoneka asi age kuna dogoroka morwa honde kazirondere.