• November 19th, 2019
Login / Register

VVTC a gandja oonzapo dhonkatu ontintatu kaalongwa ye li 600


Victoria Kaapanda

ONGWEDIVA -Ewiliko lyenongelo lyuungomba moNgwediva, tali ithanwa Valombola Vocational Training Centre (VVTC) olya gandja oonzapo dhonkatu ontintatu yopashigwawana noyopawungomba kaayilongi ye li 600 mEtiyali mOngwediva.

Minista Gwelongo lyopombanda Itah Kandjii-Murangi okwa ti ope na eshongo enene lya taalela oshigwana pethimbo ndika, nolyomonakuyiwa oshoka omwaalu gwaanyasha kaye na iilonga otagu ende gwa uka pombanda esiku kehe omanga mboka taya mono ehongo aashonashona.

“Onda pandula VVTC opamwe naaniilonga ayehe, sho ya tsikile notaya tsikile oku longa iilonga iiwanawa noya simiana moshigwana, eyitulemo lyeni olya eta elunduluko enene oshowo ehumokomeho lyoonkalamwenyo odhindji mwa kwatelwa aalongwa mbaka ye li mpaka nena,” Murangi ta ti ngaaka.

Murangi okwa li a kumagidha mboka ya dhewulilwa iimpungu ya yoloka opo ya longithe uunongo mboka ya li ya mono okupitila moshiputudhilo shoka. Okwa li a gandja oshi holelwa shomunangeshefa omunene nokwa tseyika nawa, ngoka a li a sikola naye moVVTC Ben Hauwanga.

Hauwanga okwa li a mono onzapo ye yoAutomechanics moValombola, nonena oku na oositola tadhi ithanwa BH konyala miitopolwa ayihe yoshilongo. Moomumvo 2016 okwa li a pewa onkatu yuundohotola molwa iilonga ye yuunangeshefa kouniversiti yoInternational University of Management.

Gumwe a li a kalelepo aalongwa aakwawo mboka ya li ya nongekwa, Henock Pangeiko okwa li a popi ta ti oshilongo osha pumbwa elongo lyopawungomba, opo ya vule oku ka tota oongeshefa dhawo yene, yo woo ya kute mboka kaye na iilonga oshowo oshimaliwa shi koke moshilongo.

Iimpungu mbyoka ya li ya pewa oonzapo ongaashi, uunambelewa, omalusheno, okutunga, okufikila, okuhondja, okuteleka, okulonga niikwapiilangi, ikwaisikasa, oshowo ikwapayipi.


Staff Reporter
2019-09-26 08:19:23 1 months ago

Be the first to post a comment...

You might also like...