• September 21st, 2020
Login / Register

Wendelinus a yauka mo mefuta



Eshenge lya tseyika nawa Wendelinus Ndiwakalunga Hamutenya okwa ti, ye nomusamane gwe, oya pitita ko notaya hokana muule womasiku omashoka. 
Hamutenya ngoka iiluka kutya oye meme Maria Omuyapuki, ota ti okwii tala ko onga omunelago sho ye nomuyalekwa gwe taya ka ganena lwotongondjokana, ndjoka tayi ka hokanena koSouth Afrika. Nonande moNamibia inamupitikwa omashenge ga ihokanathane, uuthemba womashenge owa gamenwa.

Tango, Hamutenya (47) na Imms Jeremiah Hambiya (32) otaya kahonathana, no taya ka pewa onzapo yondjokana koSouth Africa momasiku omafupi,  omanga taya longekidha esiku lyetyapulo ndjoka lya tengenekwa lika kale ko momasiku 5 gaDesemba nuumvo mOvenduka, nokonima otaya ka ya konooli opo ohango yika dhanenwe komukunda. Ta ti ye nomusaane gwe ayehe Aanamibia, Hamutenya omupopi gwekalaka lyOshikwanyama omanga Hambiya omupopi gwOshingandjera.

“Ondi uvite nawa shili, oshoka otandi hokana nomuntu ndi mu hole shili. Out holathane atuhe, nondi na omukumo kutya otatu ka kala nombili yetu yina elago sigo aluhe,” Hamutenya a popi ngaaka.

Ta ti, inashi za kehalo lyawo opo okakalata kohango yawo kaye komalungula. Okwa li ashike ya hiya ookume kawo mboka oyo ye katendelekitha sigo oongaka.  Ta popi ta ti kaye na we nkene ya ninge ashike oye na okuhokana nuumvo. Hamutenya okwa ti, okuna uunona wuli uyali, okakadhona nokamati kamwe oke na omimvo heyali nokakwao 11, ta ti Jeremiah naye wo oku na aanona yaali ayehe aakadhona. 
“Atuhe nomuholike gwandje otuna nale uunona, onkene shoka tatu lalakanene okutunga ashike ezimo lyetu. Otwa yambewa oshoka aakwanezimo yetu kaye na uupyakadhi nondjokana yetu,” Hamutenya a popi ngaaka.

Ta ti, sho kwali a tseyithile uunona we mboka hawu kala nomumwayina kadhona kutya ota hokana, owa li wa nyanyakwa noonkondo. Kundana sho ali, a pula kutya ote keshi enditha ngini mondjokana nomulumentu omukwao, oshoka oha vulu okukala natango naakiintu, okwa yamukula ta ti, “shoka osha mona ehulilo”, paife okwa mona mwene ngoka ina hala no ita hala okumuyaka nomuntu gumwe we, ihe oye awike ta kala omuholike gwe sigo aluhe. Omashenge ngaka oga kala oomvula ndatu pamwe. Ta ti oya kala ye na ombili no hole yawo ohayi koko kehe esiku, shoka osho sheya pe omukumo opo ya tokola okuhokanathana.

Hamutenya okwa yelitha ta ti, otaya kahokana onge omusamane nomusamane nonande megumbo oye ngaa ngeno ta ithanwa onge omukiintu oshoka oye taka taamba ofani, Jeremiah.  Ta gwedha po ta ti, ohole ka yina ondjindikila, yo ohole ihayi kongwa ihe ohayi ya kuyo yene. Kehe gumwe okuna uuthemba okukala nomuntu ngoka ehole sho osho a tokola eshi ninge.
Okwa kumagidha omashenge omakwao ta ti, naga kuthe etokolo ndyoka ya hala no ye wete lyili mondjila, oshoka kehe gumwe okuna uuthemba okukala naa ngoka a hala okukala naye, naya hulithe po okuholama etaya manguluka.


Victoria Kaapanda
2020-05-28 09:32:32 3 months ago

Be the first to post a comment...