• September 26th, 2020
Login / Register

Ya mono okashina kokupata ooshako dhuusila


Ongeshefa yiitungitho yedhina Shivute Buildings Hardware Supplies oya kwathele ehangano tali gongele iikulya noku pa mboka ya etelwa ompumbwe yoondja ketukuko lyoCovid-19.
Ongeshefa ndjoka oya kandje kehangano lya tseyika nanwa Kwathela Oshigwana okashina kokupata ooshako dhomausila ngoka haya tsu noku ga tumima kwaamboka ye li mompumbwe. 

Okashina okali ka gandjwa onga omagano kehengano ndyoka, konima yali ya pula ekwatho, oshoka oya kala taya longo nuudhigu okupata ooshako.
Mwene gwongeshefa ndyoka Elifas Shivute okwa ti, shoka okwe shi ningi oshoka okwali a mono shoka ehangano ndyoka tali longele oshigwan.
“Ehangano lyaKwafela oshigwana otali longo iilonga yi na oshilonga moshigwana onkene oli na okukwathelwa poompito adhihe uuna tali indile omakwatho,” Shivute ta ti ngaaka.

Ta gwedha po ta ti, natango okwali a yambidhidha netompelo loyokukwathela oshigwana ngaashi naana heshi ningilwa koshigwana.
Ngoka a toto po ehangano ndyoka lyokukwathela oshigwana, Cornelius Paulus okwa ti,  oya pandula kokashina ya yambidhwa nako oshoka oya kala taya longo nuudhigu.
“Itatu indile we uushina waantu okupata ooshako dhetu. Iilonga yetu ya ningwa iipu. Otwa kala noku hehela okashina kokupata ooshako, ihe inashi kala oshipu nando,” Paulus ta popi ngaaka.

Paulus okwa ti okashina hoka ya pewa oke na ongushu yoN$ 5 000. 
Ta gwedha po ta ti Shivute natango okwali a kwathele yina yaanona aakwanambwiyu, ngoka a li a indile ekwatho moshigwana, ta ti ke na sha okupa uunona we.
“Shivute okwali a landele omukiintu ngoka iikulya, omahini gaanona oshowo iikutu yongushu N$2 000,” Paulus ta popi ngaaka.


Victoria Kaapanda
2020-09-07 10:17:36 19 days ago

Be the first to post a comment...