• August 4th, 2020
Login / Register

Ya pewa egeelo elulu kelelo lyopamuthigululwakalo sho ya yaka  oondoongi


Elelo lyopamuthigululwakalo lyUukwaluudhi olya mbendeka aalumentu yaali omageelo ya fute kehe oondoongi omugoyi nenge ya fute oshimaliwa shooN$14 000, mbaka yaali oya li ya monika ondjo mokuyaka oondoongi hamano dhaantu ya yooloka.
Kristofina Niilenge okwa li a gandja omageelo ngaka kuFrans Shikwanyu naErastus Johannes oshiwike sha za ko mompangu yopamuthigululwakalo mOnguludhiya moshikandjohogololo shaTsandi moshitopolwa shaMusati. 

Okwa li a fatulula kutya kehe ondoongi ya yakwa kwambaka yaali otayi futwa oondoongi ndatu naambaka otaya vulu okutopolwa omwaalu uuna taya futu. Mbaka yaali wo oya tegelelwa ya fute iimaliwa mbika kehulilo lyAapiliili 2021 na itaku ka gwedhelwa nando omasiku.
“Otandi mu takelwe omunwe mwaa endulule oshinima shika. Oshikando tashi landula egeelo otali ka kala lyi vule po mpaka oshoka itatu ka pitika oondunge dha tya ngeyi mokati kaagundjuka mboka twa tala ko onga aaleli yetu yokomongula,” ta fatulula ngaaka.

Mbaka yaali anuwa oya li ya monika taya hingi oondoongi okuza koTsandi yu ukitha komukunda Okaandi oomwedhi mbali dha pita po noya li anuwa ya landulwa kaalumentu yaali mboka ya li haya takamitha dhimwe dhomoondoongi. Mbaka yaali mboka ya li taya gandja uumbanigi wawo manga ya thikama mokati kompangu, oya li ya itaala ondjo yawo, noya ti otaya ked hi konga noku dhi galilila ooyene.
Mboka ya li ya landula aalumentu mbaka yali okwa gandja uumbangi kutya oya li ya hingi oondoongi noku dhi tula moshigunda. Ta ti yo oya tokola ihe okulala pondje yoshigunda opo ya koleke ngele oondoongi odho tuu dhawo manga inaaya ka lopota koomwene gwomukunda.
“Konima sho twa mono kutyya moshigunda moka omwa li wo oongombe, otwa li twa tokola tu lopotele oshiningwanima shika kumwene gomukunda. Sho twa galukile poshigunda mpoka inatu adha mo we iimuna,” osho oombangi dha ti ngaaka.
Ompangu ndjika ya li ya ningilwa kohi yomuti oya li ya hili aapulakeni oyendji. 


Loide Jason
2020-07-03 09:38:44 1 months ago

Be the first to post a comment...