• November 16th, 2019
Login / Register

Ya pewa omashina gokuhondja



Victoria Kaapanda

OUTAPI-Omukiintu gwomimvo 53 Gieselinde Pahukeni okwa li  a ulike uunkulungu we wiilonga yiikaha oshiwike sha zi ko sho ya li ya pewa omagano gomashina gokuhondja kUuministeli Wuukashikekookantu nOnkalonawa oshowo gamwe ga  zi koChina. 

Pahukeni oha hondjo nokutula kumwe omagwe oku eta po sha. Ngaashi okuninga uundjato, omapaya gokuzala moshiya, omawe gomontulo nenge gomoshiya, oongaku oshowo kehe shoka sha nika omuzalomwa.

“Onda kala ndi li muupyakadhi ethimbo ele, oshoka inandi kala ndi na eshina lyokuhondjitha iilandithomwa yandje mbyoka handi eta po niikaha yandje oomvula omilongo ndatu nasha dha ka pita, nonande nda kala ndi na omadhiladhilo goku etapo oshindji ihe inandi vula oshoka kandina eshina lyokuhondja”. Pahukeni ta ti ngaaka.

Ta gwedha po ta ti oha landithile kehala tali ithanwa Omusati Project koNakayale. Oku eta po epaya ohashi mu pula oshiwike shimwe oshoka oha longitha oonyala dhe mwene , Kalunga iha dhipagelwa oyana nongashiingeyi otashi kala oshipu oshoka ota ka longitha eshina lyokuhondja ndyoka hali endelele.

Pahukeni ta ti ye ke na mpoka ha hupile kamu shi mongeshefa ye ndjoka. Niishingithomwa ye okwa ti ohe yi longo a itula mo opo a mone uuhupilo. Ta ti ookasitoma dhe kadhi na siku dhe mu galukila tadhi nyenyeta kutya dha tokokelwa kepaya nenge koshinima shontumba ya landa kuye.

Ta ligola ye ta imemeha oshowo ta popi nenyanyu ta ti, ngele osho ta ka longitha eshina ngiika ongiini, nani noshitutukutuku ota ningi a lande oshoka mesiku ota vulu oku ka hondja iilandithomwa oyindji  shi vulithe sho a li hashi mu pula oshiwike ashihe ina mana shoka ta hondjo a ka landithe.

Okwa li a gandja omapandulo KUuministeli t ati  okwa pendula noonkondo sho wa ningi iilonga yawo iipu. Ta ti ngoka wu na uunongo wontumba ino kala wa lala wa tegelela oku etelwa poshitafula ihe thikama e to nyangadhala  u ete po sha, nongele owa nyengwa ka konkole poomweelo dhookansela ashike inaya tegelela epangelo li ya pe  iilonga.
Pahukeni ta ti Epangelo ohali yambidhidha ashike  mboka taya nyangadhala nale ngaashi lye ya ningile.

Minista gUukwashikekookantu nonkalonawa yuunona  Doreen Sioka  okwa li a popi kutya ehangano lyoomeme  moChina  ta li ithanwa  All China Woman Federation (ACWF) olyi lile po oomeme oshowo oku ya kwathela okulwitha oluhepo.
ACWF okwa li a gandja omashina ge li 25 kooeme Aanamibia yi ikwathele okulwitha oluhepo.

“Uuministeli wetu owa li wa  tokola okutopolela omashina ngoka  gokuhondja iikutu, oongaku, oondjato oshowo omapaya kooprojeka ndhoka. Onda hala omashina ngoka ga longithwe aantu yi itula mo noonkondo opo ya vule okukuta yakwawo mboka kaye na iilonga, oshoka elalakano oku eta po iilonga  nokukonga uuhupilo”. Doreen ta ti ngaaka.

Ta gwedha po ta ti omvula tayi ya ota ka enda niitopolwa ayihe a tale ngele omashina otaga longithwa ngaa shili, ihe ngele okwa adha  ge li ashike omutumba kage na iilonga ote ga kutha po e te ga gandja kumboka ya hala oku ga longitha moshili.

Iikandjohogololo ayihe yomoshitoplwa shaMusati oya li ya pewa omashina gokuhondja moka oomeme nootate ye li ya 57 ya li ya pewa iilonga okupitila momashina ngoka  ya li ya pewa oshali shamuhongi. Moshitopolwa shaShikoto , oomeme nootate ye li 35 oya li ya pewa iilonga okupitila momashina ngoka ga li ga gandjwa Etiyali lyoshiwike sha zi ko.    


New Era Reporter
2019-02-15 14:40:30 9 months ago

Be the first to post a comment...

You might also like...