• September 30th, 2020
Login / Register

Ya thigwa pomutenya komulilo


Mayola gwondoolopa Helao Nafidi Eraser Nghipangelwa, ota indile moshigwana opo shi kwathele naashoka shi na po okuyambidhidha egumbo ndyoka lya pipo thiluthilu oshiwike sha zi ko mOshikango.
Egumbo ndyoka okwali lyi na omala gaheyali gokulala, moka kehe mondunda kwali mu na omuntu ta hiila, nethimbo omulilo gwali gwa ponokele egumbo, ayehe oyali ya adhike ya ya kiilonga.

Nghipangelwa okwa ti, kape na uuyelele wa gwana kutya oshike sha eta omulilo, nonande taku fekelwa kutya ogwafa gwazilile koongodhi dholusheno. Ta ti okushi okupandula oshoka kape na omwenyo gwomuntu gwa kanena mo.
“Iinima ayihe yaali moondunda adhihe heyali oyapya po thiluthilu, ka kele kondunda ya hugunina ndyoka yali yeya okudhimwa kukadhimamulilo, moka mwa hupo ombete oshowo ekumbatha limwe,” Nghipangelwa a popi ngaaka.

Ta ti, aantu mboka ngaashingeyi, oya mono ekwatho lyopakathimbo, sho ya pewa otenda, niikulya yo pokathimbo kombelewa yaNgoloneya.
Ta gwedha po ta ti, elelo lyondoolopa lyaHelao Nafidi nalyo okwali olye ya yambidhidha niikulya iishona omanga tali kambadhala okugwedha po natango shoka taya mono po.

Okwa pandula natango omulumentu ngoka ali a ya mbidhidha  noombete mbali, ta ti, osha simana ngele oshigwana tashi iyambidhidha pethimbo lyomawudhigu gatya ngaaka.
“Otandi indile oshigwana ashihe shaNambia opo shi kwathele aantu mboka ya thigwa komulilo pomutenya. Kehe ngoka e na shoka a hala okugandja na thike poombelewa  dhetu,”Nghipangelwa ta popi ngaaka.
 


Victoria Kaapanda
2020-08-03 09:27:58 1 months ago

Be the first to post a comment...