• December 5th, 2020
Login / Register

Yaali ya tsuwa nokusa oshiwike sha zi ko


Johannes Fredrick Mwakoleka (19) okwa tsuwa nokusa komunahambo omukwawo oshiwike sha zi ko momudhinjgoloko gwaRuacana moshitopolwa shaMusati.
Omupopiliko gwopolisi moshitopolwa moka Titus Shikongo okwa ti,  Mwakolekwa okwa tsuwa komunahambo omukwawo gwomimvo 24, konima ya li ya nyenyeta.

“Otaku hokololwa kutya aalumentu mboka kwa li ya zi koondingodho oy ali ya tameke okunyenyeta, hoka kwa faalela sigo okukwatathana komalutu,” Shikongo ta ti ngaaka.
Ta ti, omufekelwa moshiningwanima shika okwali akutha ombele eta tsu, Mwakoleka montulo kombinga yokolumoho, eta si ethimbo olyo ndyoka.
Okwamangwapo kopolisi, naakwanezimo ye oya tseyithilwa. 

Moshiningwanima shaafathana, omulumentu gwomimvo 40 okwa mangwa po kopolisi natango Etine lya zi ko, sho a tsu  Absolom Lucas (43) nokusa momukunda Iikokola moshitopolwa omo tuu moka.
Shikongo okwa ti, oshiningwanima shoka osha holoka  pethimbo aalumentu mboka ya li nayo taya nyenyeta , sigo nakusa a tsuwa mothingo komufekelwa.

“Okwali ahuluthile mondjila okuya koshipangelo,” Shikongo a popi ngaaka.
Aakwanezimo ye oya tseyithilwa.
Shikongo okwa ti, omadhipagathano oga ninga ogendji moshitopolwa moka, nuunene ohaga holoka konima yomanwino.
“Otandi kumagidha oshigwana shi shunithe pevi  okunwa kwawo. Pethimbo omalovu ga li ga kalelwa, iiningwanima yoludhi ndoka kaya li tayi lopotwa,” Shikongo ta ti.
Ta gwedha po ta ti, shoka otashi ulike lela kutya omalovu ogo uupyakadhi.     


Victoria Kaapanda
2020-10-20 08:47:14 1 months ago

Be the first to post a comment...