• August 15th, 2020
Login / Register

Yahamano ya mangwa niipa yoongaka…yatatu ya mangwa nomayego goondjamba



ONGWEDIVA – Opolisi moshitopolwa shaShana oya li ya manga po aantu yahamano shi na sha noongaka muule wiiwike iyali ya za ko. Iipa ine yoongaka osho wo ongaka yimwe yi na omwenyo oya li ya monika.  Iipa mbika oyi na ongushu ayihe kumwe yooN$200 000 omanga ongaka yi na omwenyo yi na N$150 000.  Omupopiliko gwopolisi mOshana, Warrant Officer Frieda Shikole okwa ti oshipa shongaka osha adhika sha holekwa megumbo lyomufekelwa momukunda Ehafo moshikandjohogololo Uukwiyuushona.

“Omufekelwa okwa li a adhika noshipa shongaka sha holekwa maandjawo,” Shikole ta ti ngaaka. Nguka okwa mangwa po nomakonaakono gopolisi otaga pula komeho.Oshiwike sha za ko, opolisi oya li ya dhithike aafekelwa yatano omolwa iilonga yuungangala wu na sha niithitukuti ya gamenwa.
Yaali yomaafekelwa oya li ya adhika nongaka yi na omwenyo konima sho ohauto yawo ya li ya hadhwa pomukunda Okaku kaNangula mondjila onene yaShakati nOmungwelume. Ongaka anuwa oya li ya adhika yi li kohi yoshipundi shohauto shokonima.

Aafekelwa yalwe yatatu oya li ya mangwa po ya adhika niipa yoongaka yi li koombuta dhoohauto dhawo. Mbaka yatatu oya li ya mangwa po momukunda Oniimwandi moshitopolwa shaShana. Iipa ayihe mbika oya li ya mangwa po nokugandjkwa momake guuministeli womidhingoloko nuupashiyoni.
Aalumentu yatatu oya li ya kwatwa nomiinga goondjamba momukunda Shahani moshikandjohogololo Mukwe moKavango East mEtitano, mbaka oya li ya mangwa po.

Omukwatakanithi gomakonaakono giimbulumba mopolisisi yaNamibia moKavango East Bonifatius Kanyetu molopota yopolisi okwa ti aafekelwa oya li ya kjwatwa lwopotundi 23h00 sho ya adhika ye na omiinga goondjamba. Ta ti ongushu inayi tseyika natango noya tegelelwa ya ka holoke mompangu yaMangestalata yaRundu nena.
-uuyelele wa gwedhwa po owa za koNampa

 


Nuusita Ashipala
2020-02-03 07:54:16 6 months ago

Be the first to post a comment...

You might also like...