• October 16th, 2019
Login / Register

Yanyazwa mwakukunupa uhanelwa kuzekela kwande



WINDOKO – Yana beleka mwakatengo ka Global Fund, Simataa Simasiku, walilimo zemashumi amalalu kazetalu, ili yanyazwa kamulatu wakukunupa folomani wahae nikuholofaza yana beleka niyena mwakweli ya Sope, nahanezwi kulifa masheleñi akuzekela taba yahae kwande atolongo, mwakhuta yamuatuli yomunyinyani viki yefelile. Hane afile katulo yahae, muatuli yomunyinyani Vanessa Stanley naize mutu wakacimacima sina yoo, hakonwi kulumelelwa kukuta mwahala asicaba pili khuta isikafa kale katulo.

Ndatahe bana bababeli utalimani nimilatu yakubulaya nikubata kubulaya, kakukunupa nyandi Sarah Mwilima yanana nililimo zemashumi aketalizoho kazelobapeli, ili yana zibahalizwe kuli utimezi fasibaka sakezahalelo, mi naholofalize Ester Nepolo, ili yasa amuhela likalafo nikanako ye. Nepolo ubulelwa kuli hazamayi bakeñisa likolofalo zana fumani. Kuakalezwa kuli la 28 Sope, Simasiku nailo kena mwaliofesi zakatengo ka Global Fund kwamakopanelo amuleneñi, mi ayo kunupa bababulezwi asina masisi. 

Kezahalo yene ikomokisize naha kaufela ingiwa kikhuta kuli neli yakutokwa maano, situhu nikuba niboi. “Ponahalo yataba yeo kiyamutu wasibulai yasina maikuto sakata, ili yakona kuholofaza nikubulaya batu asina masisi,” nekubulezi muatuli yomunyinyani. Khuta nebulezi hape kuli Simasiku utalimani nimulatu omutuna okakona kutisa koto yetelele haiba inge afumanwa mulatu. Kuekeza, bazekisi bamuuso nebaize bana nitaba yetiile yakumuzekisa. Simasiku yana hanile kutalusa zene ezahezi, nazibisizwe kuli kukuza kwahae kupaleliswa khuta kunyatisisa kana una nilibaka sakata. Kanako yakukupa kuzekela taba yahae kwande naize naitwanela hane akunupile bababulezwi. Nabulezi hape kuli hana kuitumelela mafosisa muzeko haukakala. Kasamulaho akuhanelwa kuzekela taba yahae kwande, Simasiku nasiezi mwasitokisi kufitela lizazi lakakutela mwakhuta la 16 Sikulu. Muatuli yomunyinyani Stanley naisize taba kwapili kulibelela buiketelo bwayomuhulu wabazekisi.
 


Maria Amakali
2019-06-24 10:42:43 3 months ago

Be the first to post a comment...

You might also like...