• November 19th, 2019
Login / Register

Yi ifala komutemo ee tayi yahwa kumwene gwehauto


WINDHOEK-Ongangala ndjoka  ya kanda dha yama sho ya ningi onkambadhala okuyaka po oshihauto shomukwashigwana gumwe natango oyi li ngashiingeyi  moshipangelo shOutapi tayi mono uuhaku omanga yi li miikaha yopolisi.

Oshiningwanima shonkambadhala yeyako lyohauto osha holoka nduno poMokko Garage, molukanda Epalela, moshikandjohogololo Onesi moshitopolwa shaMusati ongula onene yEtitatu oshiwike shika.

 Shi ikololela kuuyelele mboka wa gandjwa komupopiliko gwopolisi Inspekta Lineekela Shikongo, omufekelwa okwa ninga onkambadhala ee ta patulula omweelo gwohauto noshinima kasha shiwike, ta yi meni ee ta ningi ishewe onkambadhala okuhanagula po  epadhi lyoindjina opo a vule okuhwameka ohauto kayi na oshapi.
Aniwa omanga nduno e li metifa lyokuyaka po oshihauto shoka  ohauto ndjoka oya ningi ekudhilo ndyoka lya andutha mwene ngoka a li e ya mbala poshihauto she mpoka ee ta pula kutya ngoka ota ngingi shike moshihauto she nokwa li a umbu ondjembo mombanda nelalakano lyoku mu ganda.

“Konima nduno sho mwene gwoshihauto a umbu ondjembo mombanda, omufekelwa ngoka okwa kutha ekatana ee ta ningile mwene gwoshihauto omatilitho,” osho Shikongo a hokolola ngaaka molopota yopolisi.
Okwa ti konima sho ongangala ya ulike mwene gwoshihauto ekatana oya li ya ningi onkambadhala opo yi matuke po, ihe Shikongo okwa ti kutya mwene gwoshihauto okwa umbu ngaa nee kolutu lwongangala ndele oholo tayi mu ehameke okupitila mokooko kwe moka.

Ngashingeyi nguka oku li moshipangelo shaKamhaku moka e li ta mono uuhaku sigo ethimbo ndyoka ta ka aluka noku li monkalo tayi vulu okuthikama komeho gwompangu.

Omutamanekwa ngoka oku na omimvo dhi li 21 . Omanga mwene gwoshihauto shoka e na omumvo omilongo 41 omukalimo gwomomukunda Epalela.

Oshipotha shuulunga wohauto osha patululwa naomufekelwa okwa tegelelwa okuholoka mompangu mbalambala uuna a lalekwa mo moshipangelo.
Omakonaakono gopolisi moshiningwanima shika otaga tsikile.


Loide Jason
2019-09-13 09:08:47 2 months ago

Be the first to post a comment...

You might also like...