Uuministeli wuuhaku owa popya kutya iipumbiwa yaailongi Aanamibia ye li koCuba ndhoka dha longekidhwa kaakwanezimo nookuume otawu ka thiga po oshilongo oshiwike shika okupitila moJohannesburg. Shika osha li sha landula sho uuministeli wa li wa ndopa okutuma iipumbiwa mbika omwedhi gwa zi ko. Oondongelwa ndhika, shi ikwatelela komugandji gomayakulo, okwa tegelelwa dhi ka thike moCuba momasiku 24 Sepetemba 2020.
Uuministeli tawu ti eshongo enene ndyoka lya kala nokukateka oondongelwa ndhika okuya koHavana ompumbwe yoondhila shod ha li dha kankamekwa manga miilongo oyindji muuyuni. “Uuministeli wuuhaku owa gandja omayambidhidho kaailongi oyendji mboka ye li miilongo yi ili noyi ili muuyuni awuhe. Otatu ka kwashilipaleka onkalonawa yawo,” osho omushangwa gwa pitithwa gwa ti ngaaka. Oomwedhi mbali dha zi ko, ambasanda gwaNamibia koCuba Samuel /Goagoseb okwa li a ekelehi ompapopyo kutya opwa li pen a oondjato dhimwe dha hogololwa dhi ye koCuba nondhila yaSouth Africa. Ta ti oye ashike naanadiplomate yatano ya li ya yi nondhila ndjoka yi li mewiliko lyepangelo lyaSouth Africa. Ondhila oya li wo ya faaklele oondongelwa dhombelewa yomukalelipo gwoshilongo gwaNamibia koCuba osho wo iipumbiwa yontumba ya simana yaailongi yamwepo.