Opolisi moshitopolwa shaShana oya ti otayi patitha oongeleka ndhoka tadhi piyaganeke oshigwana nando odhi kale dhi na oombapila.

Omugandji gwomauyelele gwopolisi moshitopolwa shaShana Thomas Aiyambo okwa ti oongeleka ndhoka tadhi pukitha nokudhenga oshigwana omitse mumwe otadhi patithwa.

“Kutya ongeleka oyi na oombapila ihe itayi longo sha ikolelela komilandu nomalandulathano ga tulwa po otayi patwa,” ta po pi ngaaka.

Ta ti, oshigwana osha hala ombili, inashi hala okwiitalela kombanda yoonyala, onkene opolisi mOshana itayi pitike nando omapiyagano taga etwa koongeleka.

Ta gwedha po kutya oongeleka dhimwe otadhi lombwele aalanduli kutya otaya liwa kaashiinda nenge kaakwanezimo, shoka tashi e ta uutondwe.

“Otandi kunkulile oshigwana shi lopote iiningwanima yi li ngaaka ngele tayi holoka momidhingoloko dhawo opo opolisi yaNamibia yi kuthe onkatu,’’ ta kumagidha ngaaka.

Aiyambo okwa popi ngaaka sho kwa lopotwa omusita gwongeleka yopambepo tayi ithanwa Kakonda a yaha omulumentu gwomimvo 21 nondjembo kompadhi yokolumoho mOsoondaha. Omulumentu ngoka ota mono uuhaku moshipangelo shaShakati.

 Aiyambo okwa ti, oshiningwanima osha holoka momukunda Ashaaga.

Otaku hokololwa kutya pastoli ngoka anuwa okwa yaha Fillipus Nanyanga sho anuwa a li ta piyagameke aantu mongeleka ye.

Omusita ngoka okwa kalekwa mondholongo noshipotha she osha unduilwa komasiku 25 July nuumvo.

- vkaapanda@nepc.com.na