OKAHANDJA– Aakalimo yomolukanda Oshetu mOkahandja otaya ti kutya evi ndyoka ya hala  kali shi evi ekwiilongo ashike evi moka mwa valelwa ooyinakulu, shoka wo nasho tashi ya pe uuthemba wevi ndyoka. Oya ti kutya oya loloka okukala yaa na evi moshilongo shawo, unene tuu mondoolopa moka ya valelwa nokuputukila, onekene otaya ikuthile oveta kuyo yene nokutopolela aakalimo omahala mboka ye na ompumbwe. Onkeke oya li ya gongala mOlyomakaya nokugandja ookopi dhuuthemba wawo kokakomitiye hoka ke li pi.
Liffius !Haoseb, gumwe gwomaawunganeki noku li wo oshilyo shokakomitiye okwa ti kutya itaya ka tegelela ishewe natangao oomvula 30.
Kashi nasha noku ikuthila evi, evi olyAanamibia ayehe. Itatu ka hulitha po oku ikuthila evi sigo atuhe twa mona omahala mpoka tatu vulu okutula noofamili dhetu,”
Memory Ochs, 40, okwa ti kutya okwa valelwa nokuputukila mOkahandja ashike anuwa sigo oompaka ke na ehala mpoka ta vulu okuza, naashoka oshe mu thiminika a kale ha zi naavali ye. “Onda valelwa nokuputukila mOkahandja, ondi na aanona yandje mwene ashike sigo oompaka onda edhililwa kaavali yandje, aamwandje nayo kasiku otaya ka kala ye na aanona yawo, atuhe otatu ka za naavali yandje? Okahandja oke na omahala ogendji ga andjuka ashike kehe ethimbo tatu ningi omaindilo goopolota, ohatu lombwelwa kutya odhi na nale ooyene,” Ochs ta ti ngaaka.
Omuleli gwoPopular Democratiuc Movement, McHenry Venaani, ngoka wo a li a thika poshigongi mpaka, okwa ti kutya aakwashigwana mboka taya pula evi inaya puka nokwa ti opaliamende sho tayi ka tameka muSepetemba, ota ka gandja omadhilaadhilo ge okupitila mothanekwatotwaveta opo aantu ayehe ya vule okumona evi.

“Otandi ka gandja othanekwaveta yedhina Urban Land Settlement, opo omalelo goondoolopa ga gandje omahala kaakalimo pakathimbo, manga ya tegelea okupewa omahalka gawo yenbe,” Venaani ta ti ngaaka.
Sho a kwatathanwa naye mOsoondaha, omukalelipo guuministeli womayambulepo giitopolwa yoondoolopa niitopolwa yokuushayi Linus Garoeb okwa ti kutya okwa popya naminista noye li metifa lyokukandulapo uupyakadhi mbuka. -Nampa