Victoria kaapanda
Shoka tashi longwa kongundu tayi pangele moshilongo (SWAPO) inashi nyanyukilwa kaakwashigwana nosha li sha shololitha ehwata lyaakwashigwana kaaya kuthe ombinga momahogololo ngoka ga li ga ningwa Olyomakaya goshiweke sha zi ko moshikandjohogololo shaNdangwa yoondolopa.
Ndhoka odha popiwa koshilyo shoSwapo Ben Mulongeni sho a li a uvu omawuyelele nomanyenyeto kaakalimo oshowo kiilyo yimwe yoSwapo mondoolopa yaNdangwa.
Nonande aakwashigwana ye thike pomwaalu 16 000 ya li ya ishangitha nohokwe yokuhogolola momahogololo, aantu ashike ye li 3 792 yomomwalu gwa zi nokutumbulwa ya li ya kutha ombinga mokuhogolola.
Maahulikwa ye li yatano yoongundu dha yooloka, omwa li mwa hogololwa Leonard Negonga gongundu yoSwapo ngoka oye a li a sindana ompito yuukansela mondolopa yaNdangwa nomawi 1936, ta landulwa komuulikwahogololwa i ithikamena, omunamimvo 27 Angeline Immanuel nomawi 1402.
Mboka ya li ya kutha ombinga momahogololo, omwa kwatelwa Johannes Martin gongundu PDM a li a zi mo nomawi 326, Asser Vincent gwoAPP a zi mo nomawi 97, ta landulwa kuMandume Andreas a zi mo nomawi 31.
“Tse onga iilyo yoSwapo otse tatu yonagulapo ongundu, oshoka iilonga mbyoka tatu longo onga aaleli iiwinayi komeho gaalelwa, nomukithi ngoka ogo tagu yonagulapo ongundu. Okatongotongo nuutondwe, kape na nando etsokumwe pokati kaaleli”. Mulongeni ta ti ngaaka.
Mulongeni ta ti sho a li a mono omawuyelele kutya oshike Swapo a li a mono omawi ge thike mpoka lwotango konima yomimvo a kala noku shi enditha nawa, ota ti thimbo limwe omuuulikwa ngoka a hogololwa ina pandika kwaayehe ashike okwa hogololwa medhina lyomatompelo gontumba kwaamboka ye mu halela ompito yuukansela.
Ta ti esiku limwe ke wete lya gwana kaakwashigwana ayehe ya kale ya mona ompito yokuthika pomahogololo , oshoka oya ipyakidhila niilonga yawo yilwe.
‘Kape na ngoka ta hala okulongitha esiku lye e na okulilongitha nando oku ka kongela iimuna ye omwiidhi koohambo, a ye komahogololo ngoka itage mu etele uuwanawa, omanga e na iimuna ye tayi si ondjala” Mulongeni ta yelitha.
“Omahogololo gomeendelelo oga pumbwa ashike okuholoka ngele ngoka a li ta lele a hulitha nenge a thigi po iilonga inashi tegelelelwa.”Mulongeni ati ngaaka.
Nena epangelo ngele itali longele aakwashigwana uuwananwa naashoka ya hala nayo itaya hokwa okuhogololo oshoka ongundu tayi pangele itayi longo ngaashi aakwashigwana ya hala, naakwashigwana oya li ya sholola.
Ta ti aakwashigwana oye wete shoka tashi ningwa komeho, nongele otashi ningilwa owina nayo otaya ningi iinima owina ashike omananathana hago omawana.