Lasarus Hakwaake
EENHANA – Charles Kabajani oo a kala omunambelewa omutivali omukulunhu moshikondo shelongo, ounghulungu oshoyo omifyuululwakalo okwa pendjelwa omwedi wa djako eshi a longa noudinini onga omulongi a pyokoka oshoyo omuleli moshikondo shelongo oule weedula 33 paenghatu da yoolokafana.
Ye mwene okwa tameka eifano laye moshikondo shelongo onga omulongi ina deulilwa nokupyokokela oilonga muFebruary 1982. Nokonima okwe ke lihongela oulongi koUnivesiti yaSouth Africa oko a mona onghatu yoDegree melongo mo 1986. Konima yelihongo laye okwa longa onga omulongi woBiology oshoyo Ounamapya mosekondefikola yaMweshipandeka oshoyo Osekondefikola yaCaprivi. Pomido do1990 okwa li yo omupedukulunhufikola, nelongo laye okwa li la konekwa nawa shaashi oha pitifa ounona shimwe to nyengwa.
Dimwe domeenghatu edi a longa ode di: mo1992-1995 okwa li omukulunhufikola woSekondefikola Iipumbu, mo 1996-2001 okwa li Omutaleli a kula welongo, nomo mo 2002 – 2003 Okwa li omutaleli weefikola, nomomudo 2004-2006 okwa li omunambelewa omuwiliki melongo koshikondo shomakwashilipaleko onghushu yelongo, momudo 2009 – 2013 okwa longa onga hamushanga wopedu, nokudja mo 2013 fiyo opefimbo lopendjela okwa longa onga omunambelewa omutivali a kula melongo.
Paku longa kwaye okudja pefimbo loukoloni okwa longa nodjungu nokwa eta elongo pomufika welongo la aveshe, elongo longushu li hena okayova.
Poshitufi shaye eshi ta lekelwa moilonga, Omunambelewa Omukulunhu welongo, Sanet Steenkamp, okwa popya ta divilike kutya Kabajani okwa longa nelitulemo nonoudinini, a ulika ewiliko la ukilila nola eta elunduluko linene melongo moNamibia. Okwa ti Kabajani oye umwe a totifa po ofikola oyo hai ufanwa Rukonga Vision School moKavango Uushilo oyo ya tala unene pakuputuda ounona ovo va dengwa va lila moshilongo ashishe. Ofikola ei ohai yandje elongo okudja pondodo 8-12 noya kala tayi shi endifa nawa unene meedula da pita. Okwa fatulula kutya Rukonga otashi ti kutya “Okutula kumwe” Melaka loRukwangali. Okwa ti kutya Kabajani okwa li e na ediladilo olo loku eta ounona pamwe opo ku tungwepo oshiwana shimwe moshilongo.
Moses Gorengecho, Omukulunhufikola woRukonga okwa hokolola Charles Kabajani onga omutungipo wofikola Rukonga, okwe mu hokolola kutya oku na omaukwatya oupendafule ushi okuholelwa, okwa ti omadiladilo aye kakwa li ashike a tala kokulundulula omufindalongo ashike okwa li yoo a tala nghene ku na okunawapaleka elongo noku eta oufikepamwe melongo pakukwashilipaleka kutya ounona ava va kala va liwa oshipungo ova pewa elongo longushu.
Joshua Shilongo omukulunhufikola wosekondefikola Oshakati okwa popya Kabajani onga omuhambwidi a pyokoka melongo. Okwa ti oku na omutima woshingoli, e yadi olukeno nokwa fiya po olamba ei tai tema fiyo alushe. Oyiimati yaye otai monika keshe pamwe moshilongo, onghee okwa pumbwa okufuda po nombili, osho a xulifa noitya oyo.
Kabajani noitya yaye mwene okwa popya kutya okwa yandja onghalamwenyo yaye aishe mokuxwepopaleka elongo nonghalonawa younona paku va wilika, paku yukifa, paku va longa, paku va xunga omwenyo oshoyo pakuwanifapo eemhumbwe davo dimwe opo va kale ovanhu volela moshiwana, Okwa mana ta ti, etungululo lehongo otali nyamukula keemhumbwe dovanafikola meefikola oshoyo ovanafikola vokoiputudilo yopombada. Okwa indila ovanhu va kalekepo oukolele wavo shaashi oo oshapi yetungalo nexumokomesho loshilongo.