Omunambelewa omukulunhu koshikondo sheedolongo Commissioner General Raphael Hamunyela okwa ti oshikondo shaye oshi li momhumbwe inene yeendohotola. Okwa ti naashi osha etwa koshinima shokuhafuta eendohotola olutaima.   “Paife ohatu longo noudjuu okutwala ovanadolongo koipangelo yokokule unene tuu efimbo loufiku molwaashi komavyulonghalo kaku na  eendokotola,” Hamunyela ta ti. 

Okwa hokolola ta ti omhumbwe yeendokotola oyo imwe ya didilikwa tai dana onghandangala yakula komavyulonghalo ayeshe moshilongo. “Omafimbo amwe komavyulonghalo oku na ovanadolongo va nyika ounghundi omo haku pumbiwa eendokotola efimbo keshe,” ta ti. Okwa ti omudo wa dja ko eendokotola dihapu oda fiya po omavyulonghalo molwaashi ihadi futwa oshimaliwa shomaluteima.

Okwa ti mopaife ngaha ove na ashike ondokotola imwe tai longele kendiki levyulonghalo lokoWindhoek. “Ngeenge eendokotola tadi longele komavyulonghalo ohadi longo fiyo efimbo loufiku tashi etwa kovadolongo tava ombokelwa efimbo loufiku,” ta ti.

Hamunyela okwa ti ombelewa yaye otai ka kundafana nombelewa yomukulunhuwiliki mouministeli woikwameni kombinga yomukundu ou. 

“Ohandi ka pula omukulunhuwiliki opo eendokotola di futwe oshimaliwa shomaluteima molwaashi otashi tu eendokotola omukumo wokulonga nondjungu,” ta ti. 

Okwa weda po ta ti ombelewa yaye otai ka tuma ovanambelewa tava longele komavyulonghalo opo ve ke lihongele oundokotola. Hamunyela okwa popya yoo vali ta ti ombelewa yaye oya didilika oshiwana hashi ende oshinano shile okukatalela po ovakwapatava vavo ve li keedolongo.

- fhamalwa@nepc.com.na