WALVIS BAY – Omukalimo a tseyika nawa Kenneth Iilonga okwa koleka kutya  ota ka kutha ombinga momahogololo ga gwedhwa po guukansela goshikandjohogololo Walvis Bay Urban onga okandidate yi ithikamena. Omahogololo ngaka otaga ka ningwa mondoolopa ndjika yokomunkulofuta momasiku 15 Januali sha landula sho Hafeni Ndemula a li i ikutha miilonga ngoka a li a ulikwa kupresidente Geingob a ka kuthe po shimwe shomiipundi momutumba gwopashigwana.

Omukuluntu gwomahogololo ga gwedhwa po moWalvis Bay Jeffery Manale oshiwike shika okwa li a popi kutya Iilonga okwa li a gandja eindilo lye mOmaandaha, shoka she mu ningi omuulikwa i ithikamena omutiyali. Omukalimo gwomoWalvis Bay Knowledge Ipinge naye okwa li wo a thikama a ka kuthe ombinga momahogololo. Iilonga okwa lombwela New Era oshiwike shika kutya okwa kala omupiya gwoshigwana uule woomvula odhindji nokwa kala nokuunganeka oongundu ndhoka dhaamboka yah ala evi osho wo mboka ya dhengwa koluhepo moWalvis Bay.

 “Onda dhimbulula kutya ondi na okukutha ombinga ndi thikame momahogololo guukansela opo ndi uvike kupresidente osho wo ndi kalele po aantu yandje,” ta fatulula ngaaka. Iilonga ta ti oshinima she mu guma unene omwaalu guunona mboka hawu zi momapandaanda osho wo uudhigu mboka aavali haya palamene sho taya shangitha nokutaambitha aanona yawo moosikola. Ta ti wo okwa hala Elongombiimbeli lyi galukile moosikola. Ta popi kutya ye natango oku li oshilyo shongundu yoSwapo.

Okwa li monakuziwa a ndopa okutota ongundu ye ndjoka a li a dhilaadhila yedhina National Empowerment Fighting Corruption (NEFC). “Ngele ope na ngoka e na uupyakadhi nuukwashilyo wandje woSwapo, na galule iimaliwa yandje ee taya kutha po okakalata kawo,” Iilonga ta ti ngaaka.

“Inandi hala okwiitula mopolitika unene ashike onda hala okukwathela aantu oshoka oSwapo otayi ndopa okugwanitha po oompumbwe dhaantu molwa okwaatsa kumwe hoka ku li mongundu kwa kwatelwa komeho kwaamboka ya hala elelo lyapresidente Hage Geingob lyi ndope.”

Oongundu adhihe nenge aantu mboka taya ka kutha ombinga momahogololo ga gwedhwa po okwa tegelelwa ya ka gandje omadhina gawo momasiku 6 Desemba. Sigo ometiyali, kape na nando ongundu yimwe, mwa kwatelwa oSwapo, ya li ya gandja omadhina gawo kOkakomisi kOmahogololo.