Lüderitz – oshivilo shoipindi shokomudo oshi-12 modoolopa yaLüderitz osha hovelele onghela, momafiku 25 Apilili  nokwa teelelwa tashi ka hula mo30 Apilili 2019.  Oshivilo shoipindi shokomudo osho hashi ufanwa oshivilo shoCrayfish osha lukilwa oludi loshi oyo i na ondilo, nohai hangika ashike mefuta laLüderitz moNamibia.

Oshivilo shoCrayfish odula yoneudo otashi danwa  koshi yoshipalanyole “Efuta letu, efyuululo  letu”. Mayola wodoolpa yaLüderitz yee oku li yoo omunashipundi wolutu olo tali unganeke oshivilo eshi  Hilaria Mukapuli okwa tumbula kutya omalongekido aeshe otaa ende nawa nokwa teelelwa oinyangadalwa ya yooloka tai ka kufa ombinga moshivilo shoCrayfish oshi-12.

Moinyangadalwa nomo malihafifo oo taa ka kala moshivilo eshi sho Crayfish Festival okwa unganekwa euliko lokakadona dingi, olo tali ka kala ko nena - 26 Apilili, novashikingalo ovo tava ka mwenyeka meuliko laMiss Crayfish 2019, ovo Sunny Boy, General Jitaz noGoofy Gang.

Omalihafifo mahapu okwa unganekwa yoo ngaashi ovashingi veetuwa odo hadi shingwa oufuuli tandi dingonoka , notadi ka shambula ovo ve uya koshivilo shoCrayfish  mOlomakaya. Okwa unganekwayo olwiimbo leengalo dopamhepo, tadi ka imbwa komwiimbi D-Naff. Ota ku kala yo omaudano orugby noovollyball oyo tai ka danenwa pomukunkulofuta.
Kakele komaudano nomalihafifo, okwa unganekwa yoo efiyafano lokulya oma kolofishi, omo omufindani dingi oo ta ka findana mokulya dingi omakolofishi, ote ke lifindanena sha. 

Oohembudangele navo yoo otava ka ninga efiyafano lomuteleki kamana woikulya yomefuta.
Moshivilo shoipindi eshi omwa unganekwa omutumba wovakainhu nomutumba wovanageshefa, nelalakano okundungikafana momangeshefelo. 

Oshivilo otashi yeululwa pambelewa mo27 Apilili koMinista yeeshi needjo domefuta Bernhard Esau. 
Ovanangeshefa va yooloka okwa teelelwa tava ka kufa ombinga momauliko oipindi oCrayfish Festival 2019, modoolpa yokomunghulofuta Lüderitz.