Iigwanahangano mEtiyali oya ti kutya uupyakadhi uunene tawu gumu aantu otawu holoka muumbangalantu waEthiopia, moka aantu omayovi taya tauka moshitopolwa shaTigray esiku kehe,l taya yi iikolokosha ontuku.
Elondodho ndika olya li lya ningwa konima sho aanadiplomate naanambelewa ye na sha nuuwanawa waakalimo ya li ya lopota iikolokosha ya kwata miiti muumbangalantu nuumbugantu waTigray, sho omatanga gepangelo ga li ga tseyitha kutya oge li taga sindana noga ti oge li pokuthika moshilandopangelo shoshitopolwa shoka shedhina Mekele.
Sho omakwatathano ga tetulwa moshitopolwa moka uule wiiwike iyali okuza sho iikolokosha ya tukuka, osha ningi oshidhigu okukwashilipaleka uuyelele mbuka wa gandjwa kutya omatanga gepangelo oga uka komeho. Omuprima Abiy Mohamed, ngoka omumvogali a li a sindana epapa lyombili muuyuni lyoNobel Peace Prize, okwa li a tseyitha oshikonga shomilitali moTigray momasiku 4 Novemba, ta ti shika oya yamukula kiiponokela mbuyoka ya tamekwa kongundu tayi pangele moshitopolwa, Tigray People’s Liberation Front (TPLF). Iiponokela mbika oya li ya ningilwa ookamba dhetanga lyegameno. Ehangano lyiigwanahangano lyoontauki mEtiyali olya li lya tseyitha kutya Aathiopia ye li lwpo 27 000 oya li ya tauka nokutaaguluka oongamba yay a moSudan, omwaalu ngoka ngashiingeyi gu li paantu 4 000 taya tauka esiku kehe.
“uupyakadhi uunene otawu holoka,” omupopiliko Babar Baloch osho a li a lombwele iikundaneki komalungula okuziilila koGeneva.
“Oontawuki ndhoka tadhi fadhuka po iita otadhi tsikile okuthika dha loloka kondjila onde taya ka holama, yo oye na iinguma iishona.”
Mboka taya thiki moSudan oye na omahokololo omatilithi giiponokela taku longithwa oondjembo oonene.
“Onda mono omidhimba dha hanagulwa komitopelo,” osho Ganet Gazerdier, 75, ngoka egumbo lye lya li lya hanagulwa po mondoolopa yaHumera a li a ti, nguka ngashiingeyi oku li mokamba yoontawuki muuzilo waSudan.
“Omidhimba dhimwe odha li tadhi olo, dhi li mopate, ya dhipagwa noombele,” ta ti ngaaka.
MEtitano Abiy okwa li a ti TPLF otayi dhipaga aantu nokwa li a komanda omatanga gomoshitopolwa ga thikame nokugama ketanga lyegameno lyoshilongo.
Komushangwa koFacebook ongula yEtiyali, okwa li a ti ethimbo lyawo olya hula nomasiku tage ya iinyangadhalwa yahugunina yomatanga gokukaleka po ooveta otayi ka tulwa miilonga.
Omushangwapitithi gwepangelo mEtiyali kongulohi ogwa ti omatanga gepangelo oga kutha ko oondoolopa dhontumba muumbugantu waTigray noya taalela ngashiingeyi koMekele, ye li nokuli popepi poMehoni, ookilometa ashike 125 okuthika.
Omatanga oga li wo ga ti ogo taga kondolola uuninginino waTigray, moka iiponokela ya kala, nomehuliloshiwike oya ti oya kwata ko ondoolopa yokuumbugantu yaAlamata.
Iikolokosha ya kwata miiti oya li ya holoka mEtiyali moshitopolwa sha dhingoloka Alamata osho wo mondoolopa yokuumbangalantu yaShire, moka mu na oontawuki omayovi dhaEritrea, aanadiplomate taya ti ngaaka.
Natango mEtiyali, omushangwapitithi gwepangelo ogwa ti ettanga lyopakwiita olya li lya ningi iiponokela okuziilila mewangandjo pondje yaMekele mOmaandaha. Omuleli gwoTigray Debretsion Gebremichael okwa ti iiponokela mbyoka oya dhipaga aakwashigwana, ashike epangelo olya li lye shi ipatana.
Aanadiplomate oya ti inashi yela natango ngele omatanga gepangelo otaga ka sinda TPLF mbala, mboka ye na iikwa niipangitho yomilitali noye na omatanga ga adha po25 000 moondundu ndhoka ye shi nawa.
Omilitali yaEthiopia otaku tengenekwa yi na aakwiita ye li 150 000.