SWAKOPMUND – Aantu yeli 20 772 mOshitukulwa shErongo oyi i nyolifa pethimbo lyomainyolitho gomahogololo ga gwedwa po, ngoka ga hulu momasiku 29 Juli.  

Omukwatakanithi womahogololo mErongo, Nghipuilepo Kashindinge oye a gandja uuyelele mbuka pethimbo a li ta popi naadhaninkandangala momashango moSwakopmund. 

Kashindinge ta ti, mokati kaainyolithi yeli 20 772, yeli 9151 otaya ka kala aahogololi aape, mboka opo taya ka hogolola lwotango moonkalomwenyo dhawo.  

“Ondoolopa yaSwakopmund oyo ya mono aainyolithi aape yotango oyendji, ye li 3252, taku landula oshitopolwa shondoolopa noshokuushayi shaWalvis Bay mbyoka ye na aaishangithi yeli 1207 na yeli 1563,” Kashindinge ta fatulula.  Ta ti aantu yeli 8528 oyo mboka ya li ya hala oku pewa ookopi dhuukalata, omanga yeli 3090 yiinyolitha molwaashoka oya lundulula oondoolopa moka yali haya kala nale.   Kashindinge ta ti aaniilonga yomefuta oyo taya ka hogolola tango, momasiku 13 Novemba omanga omahogololo gaayehe taga ka tameka mesiku 27 Novemba.  

“Aaniilonga yomefuta otaya ka hogololela koLuderitz noWalvis Bay onkene aagandji yiilonga oya pumbwa okusa oshimmpwiyu kutya aaniilonga yawo oya mona ompito yokuhogolola,” Kashindinge osho a ti ohela. Okwa dhimbulukitha woo Aanamibia ayehe mboka ya kanitha uukalata wawo kutya natango oye na ompito okushi ninga, ashike shika ota shi ningilwa owala koombonge dhoECN koWindhoek.