• September 23rd, 2020
Login / Register

A dhipagwa nomakatana komulumentu gwe


OMULUMENTU momunamimvo 23, okwa mangwa po kopolisi sho a hahala nekatana kuumeke komiihole iikando oyindji sigo te mu dhipaga.
Oshiningwanima shika osha ningilwa momukunda Ouhwaala moshitopolwa shaMusati. Nakusa okwa tseyika nedhina  Nauta Amalia Munyenga (36) a yambukile momukunda omo tuu moka. Omukuluntu gwopolisi moshitopolwa moka Titus Shikongo okwa ti, oshiningwanima shoka oshaholoka lwotundi 22h00 yuusiku wOsoondaha, momudhingonongo gwaAnamulenge.

“Otwa lopotelwa kutya aaholike mboka oya kala yeli mohole uule wethimbo. Okwali ohaya zi pamwe megumbo lyayina gomukiintu ngoka nakusa paife, moka mwa ningilwa oshiningwanima shoka shinyanyaleka,” Shikongo ta ti ngaaka.
Otaku hokololwa kutya oyali ya ka tokelwa kuundingosho womomukunda gwawo, hoka ya zi taya nyenyeta. 
Yina yomukiintu ngoka a li a kotha ethimbo ndyoka, okwali a pendulwamo kekudhilo sho taya nyenyeta oshoka okwali taya ende yuuka popepi negumbo.

Omukulupe okwali a yi kuyo, e te ya ganda nokuya kutha kumwe e taya yi megumbo.
Shikongo ta ti, omulumentu ngoka sho a piti omweelo gwegumbo okwa tondoka a ka tale ekatana nokuhala kuumeke komiihole iikando oyindji, olutu aluhe ihe omukulupe ina monithwa oshiponga

Okwa hulithile mondjila oku ya koshipangelo. Shoka sha etitha enyenyeto inashi shiwika natango. Aakwanezimo ya nakusa oya tseyithilwa nomakonaakono gwopolisi ogeli metifa. Shikongo okwa kumagidha oshigwana shikale hashi lopotele opolisi meendelelo omanga iiningwaningwa ya tya ngaaka ina yi holoka yo yi keelelwe.

Kehe omukwashigwana nakale e na onomola yopolisi nenge yaapolisi yomomikunda. 
“Oonkundana dholudhi ndoka oombwinayi no tadhinyanyaleke moshigwana, onkene odhapumbwa okukeelelwa.
“Opolisi oya ilongekidha ethimbo alihe okukwathela kehe ngoka eli momahepeko. Kehe ngoka wuli monkalo yatya ngaaka nenge to ningilwa omatilitho kukuume  koye gwopiihole ninga onkambadhala wu thike popolisi yili popepi,” Shikongo a popi ngaaka.
 Opolisi otayi kutha onkatu yili mondjila okukeelela omaupyakadhi gatya ngaaka. 
Omaso otaga ende ga uka pombanda moshitopolwa shaMusati, omwedhi gwaziko, omulumentu gwomimvo 49 okwa ikutha omwenyo eli miiketanga konima a kwata omwanakadhona gwomimvo 18 koonkondo.
Omadhipago moshilonga oga tameka ishewe.


Victoria Kaapanda
2020-08-12 10:33:17 1 months ago

Be the first to post a comment...