• August 4th, 2020
Login / Register

Aanambia ye na omagumbo moAngola ohaya keelelwa okushuna kaapolisi



Victoria Kaapanda

Aanamibia ye na omagumbo moshishiindalongo Angola oy eli muupyakadhi okutaaguluka oongamba uuna ya pumbwa omakwatho goompumbwe dhi ili nodhii ili moshilongo shawo.
Ndhoka okwa li dha etwa puuyelele kaanilonga yetanga lyopolisi taya longele poongamba, esiku okakomitiye kookansela ka li ka ka talelepo oongamba dhaNamibia naAngola moshitopolwa shaMusati. 
Taya ti, Aanamibia mboka kwa li ya tungu omagumbo gawo pooha dhoongamba, yamwe oya li ya tendelwa kondje onkene ohashi kala aluhe uupyakadhi  pokati kawo naapolisi yaAngola.

“Aanamibia mboka oye na uuthemba waNamibia onkene omakwatho gawo agehe ohaye ga mono moshilongo shawo, ihe ohashi kala uupyakadhi uuna taya shuna komagumbo gawo oshoka aapolisi yaAngola ihaya kala ya hala okuya pitika, oshoka aniwa uuthemba wawo otawu ulike kutya yo Aanambia onkene naya shune koshilongo shawo,” ta fatulula ngaaka. Taya ti, ohashi pula aluhe opo ya ka fatululile aapolisi mboka  kutya aantu mboka oye na omagumbo moshilongo shawo nonande Aanamibia. Ohashi  ya shunitha monima uuna ya hala okukwata oopenzela dhawo, nenge ya hala okuya kiipangelo nenge koombelewa.

“Otu wete kutya otashi kala oshihwepo ngele poongamba tapu kala pe na okapangelo ta ka longo oowili adhihe 24. Iiwike ya zi ko opwa sila omuntu poongamba mpaka oshoka kapwa li pe na ohauto yokufala nakusa koshipangelo,” Aapolisi taya ti ngaaka.
Taya ti kehe thimbo aantu mboka oya kalela omweelo ya hala okufalwa koshipangelo, nolundji ohaye ya po uusiku nohashi kala oshidhigu oshoka ope na ashike ohauto  yimwe  nolundji ohayi adhika ya ka gwanitha po iinakugwanithwa  yilwe. Taya nyenyeta kutya, yo aapolisi noye na iinakugwanithwa yawo, ihe ngashiingeyi ohaya longo onga oambulansa okufala aanumvu koshipangelo. Oya gandja natango omanyenyeto gawo kutya oya hala omahala gokuza ga gwana oshoka ohaya topola oondunda ye li mo ooyaali, ihe kaye shi uvitile ombili nando.  “Otwa za komagumbo ga yoolokathana, ihe kasha li mondjila okukala twa talathana kehe shimwe tatu ningi. Kape na we eyooloko pokati kaalumentu nomukiintu atuhe out li ashike mumwe,” Taya popi ngaaka. 

Omahala gawo oge li monkalo yi nyanyaleka , uundjugo owa tsipuka nezimba otali nika momudhingoloko aguhe. Taya indile kutya oya pumbwa omahala gawo ga opalekwa, ga kale ge li monkalo ombwaanawa oshoka otashi ya shololitha okuthiga po iilonga. 
Omunashipundi gokakomitiye komutumba gookansela momutumba gwopashigwana Libbius Tobias okwa ti omanyenyeto agehe oye ga ndhindhilika, notaye ke shi tula miilonga naakalelipo yaanambelewa. 
“Shoka shi na okukandulwa po momudhingoloko nashi ningwe meendelelo, opo aaniilonga ya longe iilonga yawo nelandulathano. Aanambelewa oye li  momidhingoloko tadhi nyanyaleke,”Tobias a popi ngaaka. 


Victoria Kaapanda
2020-07-28 11:26:02 6 days ago

Be the first to post a comment...