• May 25th, 2020
Login / Register

Aanamibia naya tule po okatongo – Geingob



OMUPRESIDENTE Hage Geingob okwa ti aaNamibia oyendji oye na uukwamuhoko, oshinima shoka a
ti kashi shi oshinima oshiwanawa na iteshi popile nande onga omuleli gwaNamibia.
Shika okwe shi popi pethimbo a langekelwa koshipundi onga omutse gwoshilongo, oshikando oshitayili. Geingob ota ka lela ishewe Namibia uule woomvula ntano komeho. Oshiindingili shika osha ningilwa,
pegumbo lyepangelo moWindhoek mOlyomakaya gehulilo shiwike twa zi.

Geingob ngoka a tambula ko oshipundi she nenyanyu nokwali ta imemeha omanga ina pewa omukandalelo gwe gwoshilongo okwa hokolola kutya ehalo lye enene noshilalakanenwa she oshinene osho shoka kutya; Namibia li kale lya hangana. “Ngaye onda hala andola Namibia olya hangana kali na okatongo, nenge olwaala lwasha na ngeno uunona wa za komihoko dha yooloka tawu dhana tawu kala wiikwata moonyala,” osho a hokolola ngaaka newi lyafa lya yemata.

Geingob ngoka okwali a tumbaleke kaaleli ooyakwawo noombushe miilonga pethimbo ndyoka mboka yeya oku kala ooihoontali sho ta ganenwa miilonga ye ta simaneke woo iilongadhalwa pakotampango yombelewa onene yoshilongo.

Aapopi ya yooloka mboka unene yeli omitse dhiilongo ngaashi oshilongo shopuushinda Zimbwabwe, Zambia, Botswana noshowo South Africa oya hokolola uukumwe wawo naNamibia etaya tumbaleke Geingob onga  gumwe gwomaaleli aawanawa muAfrica. Nonande Africa olili limwe lyomomanenevi
ngoka ga taalelwa kombuto yoCoronavirus shika aaleli oyati itashi ya ngambeke okuya oku kala ooihoontali dhaGeingob sho ta langekwa koshipundi. “Oshili sha pumba muuyuni omuleli to langekwa koshipundi ashike ka puna omakuunguto ogendji. Na tse otuli tuuvite uunambano kutya oto shuna ko na
tango koshipundi opo wulele oshigwana shaNamibia uli onga omuleli muAfrica,” osho Naledi Pandor ominista yiikwapondje nomakwatathano gwokondjeyoshilongo muSouth Africa a hokolola ngaaka sho
a popi pehala lyomupresidente gwe Cyril Ramaphosa. Poshituthi opo tuu mpoka, Ombaanga yaNamibia yo oya ulike oshimaliwa oshipeekepaka onga edhimbuluko lyemanguluko lyaNamibia oshikando oshiti-30.
Oshimaliwa shika sooN$30 oshali sha ulikwa kOmupresidente gwoshilongo.

Oondola dhoka ngashingeyi otadhi ka kala oshimaliwa shimwe ashike shoka sha longwa shina omitse dhaapresidente yaNamibia, okuza komuleli gwotango Sem Shafiishuna Nuyoma, ompresidente omutiyali
Hifikepunye Pohamba noshowo Geingob ye mwene.

Omukuluntupithi gwombaanga yaNamibia Iipumbu Shiimi okwa hokolola kutya shoka osho edhidhiliko lyaNamibia a hangana na okuna omatompelo oku tyapula esiku lyawo lyekondjelomanguluko.
Ngashingeyi omupresidente okwa tegelewa ashike a kuulike iilyo yokambinete moka mwa kwatelwa oominasta dhe oompe oshoka ngashingeyi okuna ashike omupevi-president, omupilima gwoshilongo noshowo omupevi pilima gwoshilongo mboka ya ganithilwa iilonga yawo pamwe naye mOlyomakaya
ga zi ko.


Loide Jason
2020-03-23 10:45:09 2 months ago

Be the first to post a comment...