KATIMA MULILO – Muñoli Yainelezi wa Liluko la Bundui Moses Maurihungirire ukupile linaha zewela mwa katengo kakabona zapabalelo yalitapi ili kakazibahala ka Kavango-Zambezi (KAZA) Transfrontier Conservation Area (TFCA) kuli basebeze hamoho mwakubukeleza litapi kakubona kuli bolyaminzi babapila mwalibaka zetibiswa kimezi amuunda baba nikabelo.

Maurihungirire nabulezi manzwi awo kanako yakukwalula simubuso mukopano wamazazi amabeli walinaha zewela mwa katengo ka KAZA TFCA mwa Katima Mulilo viki yefelile. Naize kubateñi kubolyaminzi bamwalibaka zetiba kuka mbweshafaza pabalelo yalitapi nikubona kuli sicaba sifumana lico.

Nabulezi hape kuli nihakuna ni milao yezamaisa bundui, kubona kuli sicaba babuluka milao yeo ibile taba yetata. Naekelize kuli bundui bwabusinyi nikuekezeha kwa mandui kuzwelela kwalinaha zesiyo mwakatengo kutisize kufukuzeha kwa litapi. “Kanako yacwale luse lulemuhile taba yakundongwamela tekisano yalitapi bakeñisa mali alitisa, mi litapi lisekiswa mane nikwalinaha zeswanasina DRC. Zeo kamukana lisunda litapi ili taba yetisize kuli lifukuzehe,” nabulezi. Hanabulela kwamukopano oswana mubusisi wasikiliti sa Zambezi Lawrence Sampofu nasupile kuli litapi mwasikiliti sa Zambezi libile zabutokwa mane cwalo nikwakuhula kwasifumu sanaha. 

Nabulezi hape kuli nihakuna nilitaba zakuzuma litapi, sikiliti sa Zambezi sibonisize mutala omunde mwakubukeleza litapi mwanaha kaufela. “Sikiliti sa Zambezi sitisize libaka zapabalelo yalitapi mwanaha zapili kwa Sikunga ni Impalila mane zeñwi lisataha. Kakuekeza luna nisizwale nibelubapani nibona banaha Zambia sakuli litapi halikwalwa lubeleka hamoho,” nekubulezi Sampofu. Mukopano noezizwe kulika kulemuha litaba zabutokwa mwakuhulisa pabalelo yalitapi hala linaha zakatengo, mi teñi nekuna ni limembala kuzwelela mwalinaha zewela mwakatengo ka KAZA TCFA zecwale ka Angola, Botswana, Namibia, Zambia ni Zimbabwe.