• October 20th, 2020
Login / Register

Etundi Investment a gandja iikulya mOshakati



ONGWEDIVA – Ehangano lyedhina Etundi Investment olya gandja iikulya yongushu N$11 000 kelelo lyondoolopa yaShakati Etitatu, opo lyi kwathele aakalimo yomOshakati mboka ya pumbwa unene ekwatho noya kanitha iiyemo yawo.

Ehangano ndyoka okwa li lya ndhindhilike kutya, mOshakati omu na aakalimo ya pita po50 000, mboka oyendji yomuyo ya kala taya hupile mokapana, okuhondja nenge moondingosho ndhoka dha patwa omolwomukithi gwoCovid-19.
“Iikulya mbyoka twa li twa gandja, oyo kukwathela aakalimo yomOshakati,  mboka iiyemo yawo ya shuna pevi oshowo oongeshefa dhawo dha patwa omolwomukithi gwoCovid-19,” Ngoka a kalele po ehangano  ndyoka Christoph Amwaala  a popi ngaaka.
Elelo lyondolopa lyaShakati okwa li lya yambidhidhwa niikulya ngaashi omalwshi, uusila, omakoloni, omagadhi gwokulya, oosuka, oosopa oshowo oondoha dhoohi lyikatopolele aakalimo yomOshakati.

Omugandjimulombo mombelewa yelelo lyondoolopa Katarina Kamari okwa ti iikulya mbyoka otayi ka gandjwa ashike kwaamboka ye li mompumbwe noya kanitha iiyemo yawo omolwoCovid-19 miitopolwa ayihe mOshakati.
Mayola gwaShakati Angelius Iyambo okwa ti okwa pandula kwaa shoka sha ningwa kehangano  ndyoka. 
“Elelo lyondoolopa natango otali ithana aanangeshefa aanene naashona, natango ya thike mpoka pwa thiki yakwawo, opo ya kwathele naashoka ye na po, okukwathela oshigwana unene mboka ya kanithe iiyemo yawo pethimbo ndika,” Iyambo ta ti ngaka.
Iyambo okwa ti, oshigwana inashi kala ashike sha tala koshipala shepangelo, oshoka epangelo nalyo otali kambadhala ashihe tali vulu okukwathelwa oshigwana pethimbo ndika, onkene natango olya pumbwa okuyambidhidhwa mpoka tali nyengwa.


Victoria Kaapanda
2020-05-15 09:32:34 5 months ago

Be the first to post a comment...

You might also like...