• November 14th, 2019
Login / Register

Inapu mangwa nando ogumwe moshiningwanima shuuzigo pOnathinge



ONGWEDIVA – Sigo okeluwa ndika inapu mangwa nando omuntu shi na sha neso lyomuniilonga omukulu gwElelo Lyopamuthigululwakalo lyaNdonga ngoka muMaalitsa a li anuwa a thiminikwa a nwe uuzigo kaalumentu yatatu inaaya tseyika, sha ningilwa mondunda ye yokulala pOnethindi moshitopolwa shaShikoto.

Oshihakanwa shomuyonena nguka, omunamimvo 30 Barakias Kunasha, okwa li a si konima yomwedhi moshipangelo shaNandjokwe. Omukuluntu gwopolisi mOshikoto Armas Shivute okwa ti omakonaakono moshiningwanima shika oga pwa ashike olopota yetando lyomudhimba kayi po natango.
“Otwa tegelela natango iizemo yetando opo ihe tatu vulu okukatuka onkatu shi ikolelela koshizemo. Otwa inekela otashi zi mo masiku,” Armas ta ti. Oshipotha natango osha patuluka.

Kunasha okwa li anuwa a thindilwa oshikunwa shoka shi na ezimba tali limbilike kaalumentu yatatu. Anuwa uukende uyali owa li wa thigwa mondunda ye, moka kamwe ka li ke na oshitata shoshikunguluki shoka.
Ta hokolola oshiningwanima shika muMaalitsa ethimbo e li moshipangelo mOnandjokwe, Kunasha okwa ti aalumentu mbaka oya teya ondunda ye, taye mu kwata komaako, komagulu nokomutse noku mu thindila a kale omutumba a ukilila noku mu zila anuwa oshikunguluki shoka.

Ta ti aalumentu mbaka ka li ta vulu oku ya dhimbulula oshoka oya li yi isiikila kiipala yo oya zala omanyala. Kunasha okwa li a ningi iilalo mokana sigo omepunda, shoka she mu dhigupalele ngele tashi ya kokupona iikulya.

Mboka ye na uuyelele otaya ti manga inaa pewa uuzigo, omulumentu gumwe omugundjuka, ngoka a tseyika kopolisi, okwa li a talele po omudhingoloko mpoka hapu zi Kunasha nokwa pula a ulikilwe ondunda ye. Mboka ya li po anuwa oya tindi oku mu ulukila ondunda noya pula a kwatathane naKunasha.
“Sho aantu ya pula ya longithe ongodhi ye ya kwatathane naKunasha, omulumentu okwa li a tindi nokwa pula ye mu lombwele kutya opo a li te mu kongo,” onzo tayi ti ngaaka.
 


Nuusita Ashipala
2019-08-22 08:24:28 2 months ago

Be the first to post a comment...

You might also like...