• December 18th, 2018
Login / Register

Khuse FC oye enyakwa epe lyuudhano woHome Sweet Home



Ondangwa - Osipana yoKhuse FC yomOshakati ya ningi osipana yotango okusindana po ekopi lyoHome Sweet Home ndyoka opo lya zi miipakete motonamende ndjoka ya li ko Olyomakaya ga za ko mOndangwa.

Khuse FC okwa li a holola oonkondo noku ulika kutya ye ke shi katana sho a pe oosipana ndhoka a li a dhana nadho nambwa nokusindana po ekopi ndika.

Khuse okwa li a dhenge Hope Academy 1-0 medhingoloko etiyali lyahugunina nesindano ndika olya li lye mu pe okatekete kokuya kedhingoloko lyahugunina.

Ondangwa United oya li ya dhenge mo Africa Motto 3-1 medhingoloko etiyali lyahugunina nokuninga oshilage naKhuse medhingoloko lyahugunina.

Khuse FC nOndangwa United oya li ya ti pwaka muudhano mboka wa li wa thigi oyendji ya lala oshoka mpeyaka opwa li olukaku talu topa na kapwa li osipana ya hala oku pewa okatoma konkwawo.
Uudhano owa  kala wa ninga oshuulilo unene tuu mokati kokaple, moka oosipana ndhika dha li tadhi ulike kutya adhihe odhi na oonkondo.

Khuse FC okwa li a holola kutya esimano ndyoka a li a mono omvula ya za ko sho a li a dhenge Tigers FC ka li iipunduka ashike oku li endangalati ngele otashi ya mokatanga kokoompadhi onkene okwa li a tula mo okoola yimwe ndjoka ya li ya kutha omasipa pokati koombwa.

Omuhikihiya sho a fudhile okahiya ka hugunina eyalulo olya li Khuse FC 1-0 Ondangwa United.
Khuse Fc okwa li a pewa olupandu lwooN$5000, ekopi, oomendalia dhoshingoli osho wo oondjato dha yeleka aadhani.
Ondangwa United oya li ya fadhuka po nokapandi kooN$4000, oombandi dhoshisiliveli osho wo uugala wokomitse.
Oosipana 27 odha li dha kutha ombinga muudhano mboka wa li wa dhanwa muule womukokomoko gwehuliloshiwike lya za ko.

Omugandjimulombu gwotonamende ndjika Jackson Peuyelenga Felisberto okwa ti uudhano owa li we ende po nawa na aakwashigwana oye li ya ulika ohokwe muudhano mbuka onkene okwa ti omvula ta yi ya ngele omutse ogu li kumwe nothing otaya ka gwedha mo omaludhi gwuudhano.
Okwa ti otonamende ndjika oya li wo ya pe aanangesefa aashona ompito opo ya shingithe iilandithomwa yawo muule womasiku ngoka gaali.


Shipi Elago
2018-11-09 11:19:11 1 months ago

Be the first to post a comment...