• November 13th, 2018
Login / Register

Maria Nepembe ta ka patulula oshiwike shokuulika oonguwo moshilando



WINDHEOK-Gumwepo gwomomanzuna dhingi moshilongo, Maria Nepembe ngoka a tota po ehangano lye lyomizalomwa lyedhina Ria Collection, oye ta ka patitha oshiwike shoku ulika oonguwo moshilando Olyomakaya ndjika.

Maria okwa tengenekwa ta ka ulika omizalomwa dhe ndhoka opo dha nduulukwa, mwa kwatelwa oohulukweya, oombulukweya, uuzalomwa uushona oshowo oohema dhokongeleka, ndhoka dha hondjwa nawa nodhi na omalwaala ga tsa nawa. Euliko lyahugunina lyoonguwo otali ka ningilwa poNampower Convention Centre moshilando.

Oshiwike shika shoku ulika omizalomwa omvula ndjika osha li sha tameke Omaandaha gwoshiwike shika, moka oonkulungu ndhoka dha pyokoka nawa ngele tashi ya momizalo ndhoka tadhi opalele kehe ethimbo ya li ya gongala poGoethe Institut, nokupopya kombinga yomizalo dha yoolokathana, nonkene aahondji ye na okumona iiyemo tashi pitile muunkulungu wawo. 
Oshituthi okwa li sha tameke naRuth-Janessa Funk okuza koGermany, ngoka e e na uunkulungu wu li pomuthika gwopombanda, unene tuu pondje yoshilongo. Funk okwa li ishewe a ningi uule woshiwike moshilongo, moka a kala ta talelepo oostudio dhaahondji mboka taya ulike uunongo wawo oshiwike osho tuu shika.

Kakele kwaashoka, oshituthi shika oshi li ishewe sha nana engathithi lyaahondji yomizalomwa okuza pondje yoshilongo ya adha puyahetatu. Mxolisi Luke Mkhize okuza moSouth Africa omuhondji ngoka a li a ulike omizalomwa dhe dha pyokoka nawa omvula ya za ko poshituthi osho tuu shika, nonuumvo ota galuka ishewe oku ulika oonguwo dhe ndhoka opo dha kondo.

Nivaldo Thierry naye oye e li omunduluki gwomizalomwa ngoka a tseyika nawa pondje yoshilongo, nokwa yambukile koMozambique. Thierry okwa tengenekwa taka ulika oonguwo dhe dhoshinanena, dhoshiAfrica, ndhoka dha hondjwa nawa.
Kalisto Mukoroli ngoka e li oye ta longekidha oshituthi shika okwa ti nuumvo oye li ya nana engathithi lyaahondji ya adha po35, mwa kwatelwa mboka yopondje yoshilongo.

Omalongekidho gwoshituthi shika oge li taga tsikile, nEtitano ndika aailongi yoposhiputudhilo sho College of the Arts (COTA) otaya ka ulika omizalomwa dhawo tango poStreet Cuisine pethimbo lyokomatango, omanga   aahondji mboka opo yeya mowela taya ka ulika omizalomwa dhawo poThe Confab uusiku wEtitano olyo tuu ndika.

Olyomakaya otapu ka ulikwa aahondji mboka ya pyokoka nawa poNampower Convention Centre pethimbo lyo komatango,  mpoka Maria Nepembe taka patitha oshiindingili shika uusiku. Omainyanyudho pamwe otaga kaningilwa poVibe.Mukoroli okwati nuumvo oya ithana aayendi dhingi mboka taya ka ulika omizalomwa dhawo yaadha 60, mboka yaza konyala moshilongo ashihe. Shika osho oshituthi oshititati shoku ulika oonguwo tashi ka ningwa moshilando.  


Pinehas Nakaziko
2018-11-09 11:11:11 4 days ago

Be the first to post a comment...

You might also like...