Ehangano lyoWorld Health Organisation (WHO) olya gandja omapapa gaali kuNamibia sho a longo nuudhiginini okushunitha pevi etaandelo lyomukithi go-HIV oshowo Hepatitis B.
Namibia okwa pewa oombandi dhonkatu ontiyali oshowo onkatu ontitatu ndhoka tadhi ulike esindano omolweitulemo sho omikithi ndhoka dha shuna pevi.
WHO okwa totha mo kutya Namibia oshilongo shotango muAfrica sha thiki ponkatu mpoka.
Omukuluntu gwopashitopolwa muAfrica, mehangano lyo-WHO Matshidiso Moeti okwa ti, shoka sha ningwa kuNamibia oshinene oshoka okwa hupithwa oomwenyo dhoyendji ya li ye na okufaalelwa komikithi ndhoka.
“Omikithi ndhoka odha shuna pevi, omolwaaleli yi itula mo mokuxwaxwameka elongo oshowo okugandja omayakulo guuhaku,” ta popi ngaaka.
Omupilimaminista Saara Kuugongelwa-Amadhila okwa popi ta ti inaya pewa ashike oombandi sho epangelo lyaNamibia lya longo nuudhiginini naashi aalongi yuuhaku ya longo neyitulemo, ihe omolwelongelokumwe oshowo eyitule mo lyAanamibia ayehe.
Ta ti, oya pewa oombandi ndhoka sho ya kala taya yambidhidhwa komapangelo gamwe oshowo komahangano gi ili nogi ili.
“Otwa longo kumwe atuhe opo tu shunithe pevi omikithi ndhoka dha nika oshiponga, nokwa li dhi na okukala dha faalela Aanamibia oyendji.