• July 3rd, 2020
Login / Register

Ofamili ya tongolola nakusa a lyatelwa pOkapya 


Victoria Kaapanda

ONGWEDIVA–Ofamili yomulumentu ngoka a si sho a lyatwa koshihauto mondjila onene yopokati kOndangwa nOngwediva oya yi kopolisi ohela noku mu tongolola kutya oye Mathias Paulus. 

Opolisi moshitopolwa shaShana oya li molukongo lwofamili yomuntu ngoka a lyatwela pongeshefa yedhina The System, ta tengenekwa e li pokati koomvula 30-35. Omuhingi gwoshihatu shoka sha dhipaga omuntu, naye wo ota kongwa kopolisi oshoka okwa hingi ee ta yi ontuku oku za pehala lyoshiponga.

Omugandjimulombo gwopolisi moshitopolwa shaShana Thomas Aiyambo okwa ti oshiningwanima shoka osha holoka potundi 03h20 okupendukila Osoondaha.

“Otaku hokololwa kutya omulumentu ngoka okwa li a lyatwa kohauto nokusa ethimbo olyo ndyoka. Okwa li a adhika a lala mopate naangoka e mu lyata okwa matuka po,” Aiyambo ta ti ngaaka.

Aiyambo okwali a ti nakusa ngoka ota ulike a fa e na uuvu womomadhilaadhilo sha ikwatelela kuukwatya womizalo dhe. Ishewa kappa li oshoka tashi ulike kutya oye lye nokwa zile peni. Naashoka osha li sha etele opolisi oku konga aapambele ye miikundaneki.  

Opolisi natango otayi indile ooyene yoongalashe miitopolwa ayihe ya lopote kehe ohauto tayi ya okupangelwa  kape na uyelele kutya oya ninga koshike.


Staff Reporter
2020-02-25 08:26:07 4 months ago

Be the first to post a comment...